Tuensang DBs Union-i süngkong tasen ka amenok

June 19, 2019 nü Tuensang jila nung District Gaonburas Union Tuensang indang süngkong BOC junction nungi GB’s Customary Court tashi atsüdang tangokba noksa nung angur.

Tuensang, June 19 (TYO): District Gaonburas Union Tuensang-i süngkong tasen ka chiteta June 19, 2019 nü parnok indang Customary Court Tuensang nung yuogo, ta ketdangsertem osang ka ajanga metetdaktsü.
Iba sentong nung tongti tejaokerji Tuensang Deputy Commissioner, Muhammad Ali Shihab, IAS liasü.
Iba süngkong ya Yali Village-i agütsü, aser Hd. GB Dist. Hq Tuensang, N. Khoney Honey-i sponsor asü.
GBs indang süngkong nem “Chongshen” nüngja jaloktsüogo.
Iba sentong nung jembidang tongti tejaoker Tuensang DC, Muhammad Ali-i, GBs Union Tuensang-i mapa tajung inyakba atema parnok nem tenüngsang agütsüba den külemi pai, “Iba süngkong ya district nung aliba nübur ajak asoshi lir,” ta metetdaktsü.
“Naga nungeri pei maitsü asüngsashitsü nüngdak aser bendanger yimya agi mamokbangdaktsüi pei takar sobaliba kümzüka ayutsüla,” ta paisa ayongzük.
Naga nunger lokti nung süngkong ya kanga tongtibang, ta shia pai lanurtem danga taintemi sayuba mapatemji lanurtemi benshitsüla, ta ashi.
Tanü iba süngkongji BOC junction nungi GB’s Customary Court tashi atsüa liasü. Sentong tembangba sülen court süngküm anasa sobaliba sentong ka alakteta agiogo.