Tuensang DC-i jila nung VAHAN 4.0 services tenzüktsüogo

Tuensang, Yimpoksüi/November 08 (TYO): Yimpoksüi/November 5, 2018 nü Tuensang Deputy Commissioner, L. Jamithung Lotha-i Tuensang district atema Vahan 4.0 Services tenzüktsüogo; iba sentong ya District Transport Officer office nung agi, ta tanü ketdangsertem osang ka ajanga metetdaktsü.
‘Vahan 4.0’ tenzüktsüdang Deputy Commissioner-i, iba service ajanga registration aser license atema mapang talanglang ataba kümzüktsü, kechiyong tang nungibo online ajanga apply sütettsü, ta metetdaktsü.
Iba maparen takok ngua tenzüktetba atema pai NIC Transport division Kohima dang pelaba lemsatep.
Paisa tim ketdangsertem dang workshops aser seminars ajanga nüburtem nem iba service indang metetdaktsütsü, aser nüngdakba resources atema stakeholders aser sorkar den angatettepa inyaktsü ajungshi.
Vahan 4.0 indang metetdaktsüdang Kohima nungi Sr. Programmer, NIC, Transport division, Imna Longkumer-i Vahan 4.0 nükjidongtem metetdaktsü.
Iba sentong nung DTO office, Tuensang nung Sr. HA, M. Akhumba Chang-i lokti pelaa agizükba o jembi.
Iba sentong ya Manhei, LDA leniba nung agi aser Tuensang Motor Vehicle Officer-i tepela anküp o jembia liasü.