Tuensang DC-i kaketshirtem dang vote mayoktsü mepishi

Dimapur, Sept. 08 (TYO): Youth Voters Festival, 2017 dak sendakba nung September 08, 2017 nü college student tem atema CKS Hall, Tuensang nung seminar ka agia liasü, aser iba sentong nung shisalen sayurji EAC, Tuensang HQ, Vikhoto Richa liasü.
Sentong nung Vikhoto Richa-i Systematic Voters’ Education & Electoral Participation (SVEEP) Campaign, Electoral System inyakyim, Ethical Voting aser NOTA indang metetdakja liasü.
DC aser DEO, Tuensang, L. Jamithung Lotha-i o tatsüka jembidang kaketshirtem dang vote agütsütsü atema tenüng züluoka election nung shilem agitsü ajungshi.
“Ajaki election nung shilem agia asenok lenitsü atema tetemsü lenirtem shimtsüla aser pei vote mayoktsüla. Lanurtem ya lokti tongshi lir, aser yimtenren nung temelenshi bener arutsü atema nenok dak tashi lir,” ta paisa ashi.
District Icon SVEEP, Moasenla leniba nung iba sentong agi aser EAC, Tuensang, Tsiatsusie-i lokti pelaa agizükba o jembia liasü.