Tuensang District Legal Services Authority (TDLSA)-i Childrens’ home semdang

Tuensang, November 04 (TYO): November 3, 2017 nü Tuensang District Legal Services Authority (TDLSA)-i Kohdi Children’s Home semdanga liasü.
Kohdi Children’s Home ya Tuensang jila nungi kilometer 8 pilar lir aser tang iba home nung tebur tenet aser tetsür pezü lir. Iba home nung tambu/tantsülaji arishi küm 10-11 aser tanubosangji arishi küm pongu lir, aser parnok rongnung tanur trok Government Primary School Saksi 3rd NAP Sector nung azünger aser tanur pongubo sangküm nungi ang school azüng tenzüktsü.
TDLSA team lenir, Judicial Magistrate First Class aser Secretary TDLSA, N. Kano den Panel Lawyers-i iba home nung staff tem den infrastructures, parnok maparen aser home inyakyim dak sendakba nung o lemtepa liasü.
Parnokisa tanur pongu den sensaksem, kechiyong tanur trokbo school-i oor liasü. Tanur den sensaksemdang parnok rongnung kati, parnok iba home-i aruba sülen tang tepelaba alir, kechiyong tangbo parnoki chiyungtsü peria angur, ta ashi.
TDLSA züngsemtemisa tanurtem nem juice, amstsük aser antzü agutsü. Tanurtemi tekülem ken balala atenba den Lai zünga sayu. Iba sentong nung House mother, House father, counsellor aser sorochokertem densema liasü.