Tuensang DP&DB senden menogo

Dimapur, Mongputeni/October 18 (TYO): Tuensang DC aser DP&DB Vice Chairman Mohammed Ali Shihab leniba nung Tuensang District Planning and Development Board senden October 18 nü menogo.
Senden nung züngsemtemi National Highways, District Highways aser Tuensang kübok yimtsüngtem lenmang majungba indang benoka sensaksemogo.
Iba onük nung sensaksemba mapang Secretary Red Cross Society T.Y Sangtam-i ashiba agi, iba dak sendaka aliba department-i rabir ama amshiba yimya mindok tashi iba tesem nung lenmang kodang junga malitsü.
Züngsemtemisa lenmang yanglutsüba maparen ya BRO nem agütsütsüla ta ashi, ajita asünung dang lenmang junga yanglutettsü.
Police, health amala emergency department temia lenmang majungba ajanga pei mapa nung tetsükdaktsü adokba lemsatepogo. Parnokisa, jungdak mapang parnoki mapang shidak nung pei mapa minyaktetba benoka jembi.
Maneni contractor temi lenmang yangluba yimya dak kanga temulung masüba ketdangsertemi lemsatep. Senden nung dena alirtemi maparen asadangtsü atema district committee ka tentettsü lemtet aser lenmang dak sendakba nung jenjang ka magi tashi ita shia DP&DB senden nung iba onük benoka jembitsü lemtet.
ADC Shamator Lankonsen-i District Officer tem dang parnok kübok sub divisions tem nung subordinates officers tem inyakyim asadanga alitsü mepeshi.
Kasa mapang nung Senior Treasury Officer Tuensang Imti Chang-i house dang ita nung anogo 25buba nü mesera mapa inyakba anogo 2nd last matongdang parnok indang salary bills agütsütsü mepeshi, ajita asünungdang sorkar kübok inyakertem parnok itasen tetuyuba ama ita nung tatembangbuba anogo angutsü, ta ashi, ta ketdangser sangdong ajanga metetdaktsü.