Tuensang GHSS nung Science ki tasen ka semzükogo

Dimapur, April 21 (TYO) : Tuensang Higher Secondary School nung science ki tasenba semzükba sentong April 21, 2017 nü School Auditorium nung Parliamentary Secretary for Horticulture, DBs & GBs Affairs, Kejong Chang tongti tesemdanger süa kaogo.
Sentong nung jembidang tongti tesemdangeri, tanga tesem nung oa azüngtsü melena pei atepzüng nung kaketshisatsü shitak angazüktsüla, ta kaketshirtem ajungshi.
Tanurtem nem kaketshisatsü anganüa agütsüba nung tesayurtemi kanga bendanga agüja inyaktsüla, tesayurtemi yamaji meinyakra kaketshirtemi takok mangutsü, ta paisa ashi.
Ano külen kaketshirtemia tesayurtem den amalitepa angazüktsü merangtsüla aser tanga higher secondary school tem den tajung nung tokteptsüla, ta pai shisem.
Sentong nung Tuensang DC, Alem Jongshi aser Tuensang DDEO, Sashi Ao natia o tatsütsü jembia liasü aser Tuensang TTBC nung Sannüker, Rev. H. Sangkap Chang-i ki tasenba meshiteta sarasadem.
Iba sentong nung Post Graduate Teacher, Thrilichem Sangtam menden liasü aser GT, L. Ason-i Tsüngrem temoatsü jazüka sarasadem.
Tatemsa AHM GHSS Tuensang, Takü Jamir-i anküp tepela o jembi.