Tuensang MLA temi senotsü teyari agütsü

Dimapur, June 3 (TYO): June 2, 2020 nü Tuensang Deputy Commissioner indang office nung Tuensang Sadar I MLA, Toyang Changkong Chang aser Sadar II MLA, Kejong Chang nati senden ka ayonga amen.
Iba senden nung Deputy Commissioner & Chairman, District Task Force, Superintendent of Police, Chief Medical Officer aser Eleutheros Christian Society aden.
Tuensang DC-i MLA tem dang DTF-i district nung inyakba osang lemsatep. Iba mapa nung sorkar department tem, civil society teloktem aser kijatemi yariteper, ta pai ashi.
Tuensang nung Green aser Red zone tem nungi nisungtem arua lir aser DTF-i kanga dang junga parnok anepaludar. Tuensang Quarantine Centre nung Chennai nungi arurtem kar dak COVID-19 puteta lir, ta DC-isa metetdaktsü.
Tarutsü anogotem tangalen nungi Tuensang-i nisung aika arutsü lir aser parnok anepalutsü atema mapa renema lir, ta DC-isa shisem.
Senden nung Superintendent of Police aser Chief Medical Officer naprongi parnok tebilembatem lemsatep.
MLA Toyang aser MLA Kejong naprongi Tuensang nung mapa inyakba nung temulung asüba metetdaktsü aser iba mapa nung yariteper ajak dang pelaba shisem.
Tenatisa Committee aser Department balala nem senotsü teyari agütsü. MLA anati District Task Force nem sen lakh kaka agütsü.
Tenatisa Quarantine Centres atema Fund Raising Committee nem sen lakh kaka agütsü aser frontline security personnel asoshi sen meyirjang tenemnem agütsü.
MLA Toyang aser MLA Kejong nati frontline medical/health workers nem sen meyirjang tenemnem agütsü.