Tuensang & Mokokchung nung Naknyu lum benjung mungogo

July 31, 2015 nü CKS Hall Tuensang nung Chang nunger Naknyu Lum benjung amungdang tetsürtemi yartsüngsangba (temalen) angur. Mokokchung Chang Union-i ayongzüka Town Hall, Mokokchung nung Chang nunger benjong ‘Naknyulüm’ sentong longsotepa amungba mapang tangokba noksa tsünglanglen angur. Iba sentong nung Nagaland RD minister C.L John arutsü sentong renemer liasü, saka tang ya sorkar ketdangsertem koda masüba mapang ka tenchiba ajanga pa iba sentong nung metentet. Aji saka, pai pa meyonger Wb. Khozu Konyak yoka iba benjong takok ngua agiogo. Kasa sentong nung Ao Senden, CKS, ENPUM nungi lennirtemia shilem agia tepela o den tayongzükba o balala jembi. Telok balalai kentenmenü balala ia sayuba ajanga tesentepertem peladaktsü. (Tuensang/Mokokchung July 31, 2015)

Dimapur, July 31 (TYO) : July 31, 2015 nü CKS Hall Tuensang nung Chang nunger asoshi benjung tongtipangba Naknyu Lum mungogo.
Iba benjung nung Khiamniungan Tribal Council tir, Mongchua Naknyu tejaoker liasü aser ENPO tongti tezülur, Amai Phom tetushi süa jaoker ama shilem agi.
Naga nunger aser talisa Eastern Naga nunger sobaliba nung takar lir aser sorkari Tuensang nung Cultural Research Centre ka lapok nung kanga ajungtsü, ta tanü Amai Phom-i o jembidang ashi.
Tuensang nung alirtemi tebilemtsü khuret abentsüla aser tanüngba Eastern Naga nungertem asoshi tsürabur tajung ka asütsüla. Ibaji asü nungdang tanga kintemi parnok asoshi len tuyur tajung ka ama anidaktsü, ta Amai Phom-isa ayongzük.
Naknyu tejaoker Mongchua Khiam-ia o jembidang, Yimjung ta asüba olung ajanga lokti nung terenlok o inlokba aser Telongjem ajanga lokti tejakleni odaktsür. Anungji lokti kati yimjung aser telongjem nung ammeter inyaksangshitsüla ta ayongzük.
Iba sentong nung Yimtsusangla, Advocate and Women Coordinator CCSU-i Naknyu rateta ashi, CTS (Chang Women Union)-i Kongkin tema sayu aser Lole Band-i ken aten.
Sentong nungsa Commandant 23rd Assam Rifle aser pa kinüngtsü na den tongti ketdangser aika aden.