Tuensang, Noklak nung NSCN(K) züngsem 7 kahset

Kohima, August 28 (TYO): Tanü nikongdang Tuensang district nung Noklak sub-division kübok International Trade Centre (ITC) Pangsha nung Assam Rifles aser telungpur na tsüngda kahtepdang NSCN (K) telok nungi tetsür ka densema züngsem tenet khaset aser Assam Rifles sepai ka den nisung asem yiruogo.
ITC Pangsha ya state yimtiba Kohima nungi kilometer 290 shi pilar Indo-Myanmar arrtsülen lir.
Tuensang police-i ashiba agi, iba raraji nikongdang 2:00 ako meta tenzük aser ghonda aika kahtep. Tuensang District ketdangsertem aser Police ketdangsertem iba tesem jagi oa liasü.
Ano külen PRO Assam Rifles-i ashiba agi, telok ana tsüngda kahtepba mapang tajemba agi NSCN (K) pur tenet khasetogo.
Paisa, sepaitem patrol telok ka Pangsha jila nung arrtsülen lia parnoki motorcycle ka, Gypsy ka aser Bolero ka lenmang nung arua aliba angu aser mita reprangtsü atema motorcycle ji sot, iba mapang nungji tesülen aruya aliba Gypsy aser Bolero gari ana nungi injang sashia kahloktsü, ta ashi.
Iba mapang nungjisa sepaitemia meyiper injang kahlokja kahtepdang NSCN(K) pur tenet kahset aser pezü yirutsü, ta PRO, AR-isa ashi.
Raraba mapang nungji nüburtem meyirutsü asoshi security sepaitemi kanga tazüokba nung raraogo, ta paisa shisem.
PRO-isa ashiba agi, asürtem ket nungjagi prangpong aser injang aika ngutetogo.