Tuensang nung District Task Force senden amen

Dimapur, Yimpoksüi/November 26 (TYO): Immunisation Mission Indradhanush 2.0 dak sendakba nung District Task Force senden ka menogo. Iba senden nung CMO Tuensang lenisüba kübok Medical Department, lokti tentet balala aser kiyong balala nungi lenirtem dena liasü.
Iba senden ya tanur küm ka tekübok alir shilem 90 aser iba dak tema (National percentage) immunize sütsütsü asoshi nükjidong yur aliba ataloktsü asoshi sensak asemtsü ayonga agi.
Sentong nung o jembidang DPO RCH Dr. Hungchabemo-i, nükjidong atongtsü asoshi ajak longjemer inyaktsü, sentepa aliba nüburtem ayongzük. Laisa, routine immunization kübok immunization inyakyim nung sentoker alirtem tongjemtsü asoshi inyakyim akangshitsü departments nükjidong aliba lemsatep. Hungchabemo-isa, Nagaland immunization statistics lemsatep kong Nagaland-i shilem 45 ajangteter aliba lemsatep koba India nung tajemba lir aser district tem rongnung Tuensang shilem 65 aliba metetdaktsü. Lai, linük den jangyu medem inyakyonga aotsü atema institution, lokti tentet balala aser department tem longjemer iba district nükjidong atongtsü atema meranga inyaktsü ayongzük, ta ketdangser sangdong ka ajanga metetdaktsü.