Tuensang nung jana intokba garitem tenzüktsü

April 11, 2017 nü Tuensang jila nung Swatchh Bharat Mission Tuensang District Brand Ambassador, T. Kongo-i jana bendena intokba garitem semzüktsüba noksa nung angur. 

Dimapur, April 12 (TYO): Urban Development aser Tuensang Town Council-i achaayanga April 11, 2017 nü Town Hall, Tuensang Town nung Neighbourhood Sanitation Committees aser Garbage Collection Vehicles tenzüktsü, aser iba sentong nung tongti tesemdangerji Swatchh Bharat Mission Tuensang District, Brand Ambassador, T. Khongo liasü, ta ketdangsertem osang ka ajanga metetdaktsü.
Iba sentong nung jembidang pai, district nung kanga nüngdaka aliba Garbage Collection Vehicles alitsü atema achaayanga inyakba atema ADC aser Administrator Tuensang Town Council, Nchumbemo Odyuo nem tenüngsang agutsü.
Paisa, yimtsüngtem dang tatishitsü tajung sayutsü atema Tuensang jila ya temerük asütsüla, ta ashi.
Nisung aliba tesemtem nung jana intokbaji ajanga menatepba tashidak aika poktettsü, ta paisa shia.
Pai ashiba agi, Swatchh Bharat Mission kübok Clean India ya tang Centre nung sorkar indang tongtibang schemes rongnung ka lir.
“Tarutsü putu lanurtem ajungtsü atema asenok merumeru masutsüla saka asenoki asen libaliro aser tangatetba melungsentsü melenshia temeket merükteta ayutsüla,” ta paisa ayongzük.
Mongolbarnü agiba sentong nung ADC Tuensang, Nchumbemo Odyuo-i tesentepertem pelaa agizük aser TTAWU Tir, Ato Chang aser CKS Advisor, Khoma Yangbou nati o tatsütsü jembi.
Avonuo Kire EAC (P)-i tepela anküp o jembi aser iba sentong ya Limakumla Pongener EAC (P) lenisüba kübok agia liasü.