Tuensang nung kaketshirtem tangar den kasa dang : Alemtemshi

Hokolbar nü  Loyem Memorial  High School , Tuensang tenzüker küm 25 ajungba Silver Jubilee mong nung tongti tesemdanger taoba Chief Secretary, Alemtemshi Jamiri nüngo kaket sayatsüba noksa nung angur. October 30, 2015.

Dimapur, October 30 (TYO) : Tuensang nungertem aser talisa kaketshirtemji Nagaland nung tanüngbapur den kasa dang ta taoba Nagaland Chief Secretary, Alemtemshi Jamir-i ashi.
Hokolbarnü Loyem Memorial High School Silver Jubilee benjungmung nung o jembidang Alemtemshi-i Tuensang nung shisaluyimba dak sendakba osang tejangja kar metetdaktsü.
Alemtemshi-i ashiba agi, NBSE board tatidang nung Tuensang district nungi pass asürtem noklang nung shilem 65 liasü aser ibaji advanced district kar dang nungi tajungba lir.
Iba dak sendakba nung pai ashiba agi, school alidakji tongtipang masü saka kaketshirtemi koda bushir aser parnok nem kaket shisatsü koma sayur ta asüba jiang tongtipangba.
Alemtemshi-isa Tuensang district nung kaketshirtem aser nübortem dang value based education system alitsü ayongzük.
Tuensang nung aliba shisaluyimba rejutemji tanga nung aliba den kasa dang lir ta tesüiba record tem ajanga sayur. Iba district nungi K Asangba Sangtam (taoba Lok Shaba MP), asür Imlong Chang (mezüngpur Dobashi aser Mokokchung jila nung mezüng alir), social worker Chingmak Chang nunger amala lokti nung takotet lennirtem adokogo. Anungji Tuensang nung kaketshirtemi merang azüngtsü, tajungtiba akümtsü atema bendanga agütsütsü aser tarutsü anogotem nung Tuensang nung alirtem dang masü saka Nagaland nung alirtem len anitsü, ta Alemtemshi-isa ayongzük.
Iba sentong nung NRE & E&FS Parliamentary Secretary aser school kibur, Toyang Changkong Chang-i, Tuensang Deputy Commissioner, Alemjongshi, ATPSA president, Rev Fr. VV Johnson aser president CCSU, Imti Choba Thungpang nungertemia o jembi.
Tanü sentong nung tongti tesemdanger Alemtemshi meina pa kinungtsü aser taoba chief secretary, Banuo Z Jamir, Ao Kaketshir Mungdang aser Eastern Nagaland Students’ Union Mokokchung nungi ketdangpurtem liasü.
Loyem Memorial High School ya Tuensang nung shisaluyimba reju tajung rongnung ka lir aser tang iba school nung kaketshir 478 tezüngdak lir. Iba school ya 1993 küm high school jenjang nung ajungketa liasü.