Tuensang nung konger metsüh adokdaktsüba lab semzük

Tuensang, Aenjeti/January 28, 2021 (TYO): Brehostibarnü, Director of Horticulture, Dr. R. Elithung matsüngdang Horticulture Department Tuensang-i office nung Mushroom Spawn Production Laboratory (Konger metsüh adokdaktsüba lab) ka semzüktsüogo. Iba laboratory lapokba sentong nung Bhupam Phom, Deputy Director Horticulture, Agri indang HODs aser teloktep Department Tuensang, DRDA, ECS aser Tuensang indang aluyimertem dena liasü.
Iba sentong nung Dr. Elithung-i, state nung iba laboratory ya trokbuba alitsü, koba Ministry of Agriculture, Govt of India ajanga sponsor asü aser Department-i amenok, ta ashi. Pai ashiba agi, Horticulture inyakyim rongnung konger lu ayimba ya tajangzük tulu lir, kong konger tsünütsü/anepalutsü aser bendentsü atema mapang magir. Konger ya chiyongtsü tajung ka lir, koba pei sasa tsünüa aser iba den külemi rongsenkettsüng atema anepalutsü akok. Tuensang nung konger meyidaktsüba laboratory yagi talir aser teinyaker anaprongla ajangzüktsü.
Deputy Director Horticulture, Bhupam Phom-i, tejangrar temi training agitsü akok aser pei sasa inyaktettsü atema nüngdakba konger metsüh ya meshitettsü; aser iba maparen yagi rongsenkettsüng tsütsü kanga teyari agütsütsü, ta ashi.
DAO Tuensang, K Showuba-ia, Tuensang nung aluyimertem atema konger metsüba ya mapatong tajung ka lir, ta ashi aser district nung iba ama terenlok mapa bener arutsü asoshi Agri aser teloktep Department ajak ajungshiogo.
Iba sentong nung Horti Inspector, Chemlila menden liasü aser Horti Inspector, C. Yongkonglimba-i tepela anküp o jembi, ta sangdong ka ajanga metetdaktsü.