Tuensang nung Nagaland BJP Booth level training tembangogo

Dimapur, December 14 (TYO): Tuensang Mandals/Assembly constituencies nung Nagaland BJP-i Booth-level training programmes tembangba sülen tanü Wokha 38 A/C atema town hall nung tenzükogo, ta Nagaland BJP Media Cell sangdong ka ajanga metetdaktsü.
Mandal president, Yiponthung Ezung leniba nung senden amen aser Atsenthung Ezung-i sarasadema liasü. District president, L.Meribemo Kinghen-i lokti pela agizükba den okila jembi aser general secretary 38th Mandal, Peter Humtsoe-i tepela anküp o jembia liasü.
38 A/C nungi booth-level workers 330 liasü aser iba senden nung adener BJP züngsem ajak agi 550 liasü.
Sentong nung o jembirtemji State BJP nungi taoba state President, Dr M.Chuba Ao, Media Cell Convenor, K.James Vizo aser co-convenor, Yanghose Sangtam nunger liasü.
Iba sentong nung jembidang Dr Chuba Ao-i 2018 küm atema BJP nükjidongtem metetdaktsü. Paisa, party atema tongtibang teinyaktsüji Naga nungeri agizüktettsüsa inyaktsüla aser nüburtemi ibaji tajungba bendangtettsü, ta ashi.
Sentong nungsa Yanghose-i Centre nung BJP-i aniba NDA sorkar indang schemes balala metetdaktsüdang pai, Prime Minister housing schemes kübok linük nung ki malir sensakertem atema ki crore 6 dak tema yanglutsüogo, ajisüaka Nagaland nungbo nüburtemi item ama schemes ji memetet, ta ashi.
Vizo-i BJP putiotsü, tentet inyakyim aser party-i inyakbatem indang metetdaktsü.
Paisa, “Party Tir Amit Shah aser Ato kilonser Narendra Modi na lenisüba nung linük aser alima nung yimtenren party tulutiba nung züngsem ka asüba atema asenoki nüma atanger,” ta ashi.
“Asenok atema tongtibangtiba teinyaktsüji linük tenzüktsüla, iba sülen ang party aser kibong tenzüktsüla,” ta paisa ayongzük.
Wokha sülen BJP-i maneni Mokokchung aser Longleng districts nung (BLTP) booth-level training programme agitsü.