Tuensang nung Plastic Free Campaign agi

Tuensang, January 24 (TYO): January 23, 2019 nü Tuensang District administration-i Confederation of Chang Students Union (CCSU) den ayongteper Plastic Free Campaign agiogo, iba sentong ya Tuensang Deputy Commissioner, L. Jamithung Lotha-i tenzükja liasü, ta tanü ketdangsertem osang ka ajanga metedaktsü.
Tuensang district kübok Buthanbou yimdak 56buba Confederation of Chang Students Union mongdang January 22-23 anogotem nung amongba mapang ka nung iba sentong ya agiogo.
Iba sentong nung jembidang Tuensang DC-i, plastics ya jenjang kanga temela aser mapang talangka amshiteter, ibayongji plastic aika adokdaktsür aser meimchirtemi aika amshir, ta ashi.
Ajisüaka plastics nung keta aliba chemical ji alima den mapet, aser shizüka aotsü atema mapang talangka agir, ibayongji alima menentsür, ta paisa ashi.
Iba dak sendakba nung pai adenshia alirtem dang alima kümzüktsü atema plastics ajema amshitsü ayongzük.
Iba campaign dak sendakba nung sobaliba auso aser tou nung chiyungtsü agutsü aser kaketshirtemi plastic ajema amshitsü nangzüka pledge card nung sign süa liasü.