Tuensang nung PMKSY (IWMP) Batch II sentong tembanga agiogo

Tuensang, July 16 (TYO): Department of Land Resource, Tuensang-i ayongzükba PMKSY (Integrated Watershed Management Programme) batch II sentong July 15 nü CKS Hall Tuensang nung tembanga agiogo, ta Honibarnü ketdangsertem osang ka ajanga metetdaktsü.
Iba sentong nung Department of Land Resources Deputy Director, Wanchamo Lotha den yim 20 nungi tajangzük angurtem aser watershed management committee züngsemtem dena liasü.
Iba sentong nung tongti tesemdangerji, Tuensang Deputy Commissioner, L. Jamithung Lotha liasü.
Sentong nung Land Resources DPO, P. Nribemo Patton-i PMKSY (IWMP) kübok mapatongtem aser ajangzüktetbatem osangtem metetdaktsü.
Imkumer Amer WDT (M) aser Youngsola WC Chairperson Longtukur village natia PMKSY (IWMP) dak sendakba tajangshibatem lemsatepa liasü.
Onük jembidang Tuensang Deputy Commissioner, L. Jamithung Lotha-i tajangzük angurtem dang, tanüngba yimtem den liromedema aintsüla, ibaji ajanga sorkar project ya yim atema temoatsü ka asütsü, ta metetdaktsü.
Item senotsü kanga meyaka aser shisa kaa amshitsü ayongzüka pai, product quality nung tamang akatsüla, ibaji ajanga dang tajangzük angutsü, ta metetaktsü.
Pai ashiba agi, sorkar indang project ajungaji nüburtem atema dang lir, aser nükjidong tajung yur item mapa inyakba ajanga sorkar project tem aintsü aser azükarutsü.
Sentong nungsa tongti tesemdangeri watershed management committee chairman tem nem Watershed Management Fund lema agütsü.
Ano Land Resources Department Deputy Director, Wanchamo Lotha-ia o tatsüka jembidang, PMKSY (IWMP) dak sendakba project tem nung senotsü lemzüktsüba aser itemji amshiba indang inyakyim metetdaktsüba den department indang mapalem, targeted sector aser inyakyimtem indang metetdaktsü.
Paisa Coffee plantation project aser iba ajanga tajangzük agütsübatem indang lemsatep.
Iba sentong tembangba sülen Land Resources Department Tuensang-i Exhibition ka ayongzüka project balala nungi adokdaktsübatem sayaa liasü.