Tuensang nung Road Safety sentong agi

Dimapur, October 19 (TYO): October 18, 2017 nü CKS Hall, Tuensang nung motor Vehicle Department-i “Time for Action” omen nung ajemdaker Road Safety Awareness sentong ka ayongzüka agiogo, aser iba sentong nung tongti tesemdangerji Tuensang Deputy Commissioner, L Jamithung Lotha liasü.
Iba sentong nung police, traffic police, kin balala nungi tribal lenirtem, Scouts &Guides aser gari anishirtem dena liasü.
Okila jembidang Sr. Motor Vehicle Inspector, Arenbo Peter-i motor vehicle department-i küm tepiyong agia aotsü atema road safety calendar adokba indang metetdaktsü.
Paisa linük nung gari lendong kanga bulua atalokba tebilemtsü lemsatepba den külemi Nagaland state Road safety authority-i inyakba mapatem aser gari lendong ajema akumtsü atema Road safety onüktem mapa küma inyaktsü atema ajungshi.
Gari lendong ajuruba kulitem rongnung- yi jemer gari aniba aser zübazülema gari aniba densema lir, ta paisa ashi.
Gari lendong nung jenbutsü atema seat belt inoktsü, helmets asemtsü aser gari anidang mobile phones mamshitsüla, ta paisa ashi.
DC, L Jamithung Lotha-ia traffic dak sendakba ozüngtem benshitsü atema ayongzükba den külemi gari signals aser dipper shidak amshiba densema tazüokba nung gari anishiba ajanga gari lendong ajema akumtsü, ta metetdaktsü.
Paisa ozüng amer agency tem dang “Time for Action” ajanga iba tebilemtsü koktettsü atema ozüng tesashia benoka amshitsü mepishi.
Sentong nungsa Taxi Drivers Union aser Drivers Union Tuensang-ia shilem agi.
Iba sentong ya Pursenla leniba nung agi aser Sr. Enforcement Inspector, B Chekum Chang-i tepela anküp o jembia sentong tembang.