Tuensang nung Tsüngremmung amung

Tuensang, Aug 1 (TYO): Ao Senso Telungjem Tuensang Town (ASTTT)-i ayongzüka Tsüngremmung benjong tuluka Govt. Hr. Secondary School Tuensang senden kilem nung longsotepa mungogo.
Iba sentong nung taoba Nagaland Chief Secretary Wb. Alemtemshi Jamir (Rtd IAS) tongti tesemdanger liasü aser pai iba sentong nung jembidang, pa Tuensangi arubaji pei kidangi aruba ama bilemer, kechiyong taoba mapang pa tebu N.I Jamir sorkar mapa nung tenzükdang yangi alir nüburtemi par kinünger dang temeim sayuba kodanga mamateter ta ashi.
Paisa ashiba agi, Naga nungerji oshioben, libaliro, benjongbentsü, amungtsümung, achiajemba, otsüren aser lenmang aisü nung mesüktepa lir, anungji, asenok ya adianutem dang lir. Aji oda, “asenok balala kümdaktsüba ya British nunger tai” ta paisa kuli kar dena metetdaktsü.
“Naga nunger ya telok tila ka dang lir, anungji, asenok lemdanger/sadanger lira tarutsü Naga nunger tia koma asütsü?” ta paisa shisabulua ashi.
“Tanü Naga lokti nung lemsalemko yimya samaa odaki, takar ka takar akümer aser sensaker ka kanga sensaka akümer, takar aser sensaker na ongdang tulu kümogo. Tenük masüng aser mulung machiji idak nung jagi adoker, aji oda, ibaji tarutsü atema lendong tulu lir” ta paisa tekümdangtsü olen ka lemsatep.
Chang aser Yimjungrü kin ana anemtepdang tanüngba Naga kintem ajak temulung kanga shirangogo, anungji, asenok adianu tsüngda kati ka dang temeim sayua putepa alitsü merangtsüla ta paisa inyakdaktsünüba o ka ashi.
“Asenok ama tenem kin nisungtem dakji tajunga aika lir saka ano tip külen asenoki ibaji junga mamshira yangji lendonga sentaka lir”, anungji, “koba asenok dak tajung lir, itemji muluteta tensa den apet amshia aotsübaji kanga tenüngdaktsü, aji mesüra asenok melitettsü” ta paisa shisem.
Paisa Naga nunger dak lidaktsünüba olen ka ashidang, “ochi ashiba, otia inyakba, khuret meteta inyakba, tejak meprangi liromedemtetba item noklemtemji alitsüla”.
Benjongbentsü ya pelatepa amungba mapang ka asünung, yangi aibelen kecha mali ama bilemer, anungji, tensa den apet arogoia iba nung ya shilem agitsü asoshi paisa tebilemba ka lemsatepogo.
Iba sentong nung Tuensang nung aliba senso pur telok balala den külemi Eastern Nagaland kin nungia sobaliba yar tsüngsang ken aser tepela o, tayongzükba o balala ajanga shilem agiba ajanga sentong tali meraketdaktsü.