Tuensang nung World TB Day 2017 amung

March 24, 2017 nü Tuensang jila nung CHAI PROJECT AXSHYA den IDS aser RNTCP-i ayongzüka ‘Unite to End TB’ omen nung World TB Day 2017 amungba sentong nung ANM Nursing student temi ken ka ajanga shilem agiba noksa nung angur.

Dimapur, March 24 (TYO): Alima rangben den tsüngkang medema tanü Main police point junction, Tuensang nunga CHAI PROJECT AXSHYA den IDS aser RNTCP govt of Nagaland senteper ayongzüka ‘Unite to End TB’ omen nung ajemdaker World TB Day 2017 mungogo.
Iba sentong nung school pongu nungi kaketshirtemi TB tashitak indang yimyim balala ozülu nung amer yimdong süa jaja.
TB aser iba anogomung omen nung tongti o jembirji Dr. Sungmo Chang Dy. CMO liasü aser lai TB tashitak, tashitak temaitsütem, treatment aser TB agi shirangertem dang mesenmetui benshiba indang metetdaktsü.
Laisa melungtet teloktem aser sorkar depts. dang district nung TB tashitak anema inyakba nungittsüla, kechiyong iba ya nisung tepsetba tashitak tamajung rongnung ka lir aser iba tashitak ajanga aika asür, ta ashi.
Loyem Memorial School Principal, Debashish Deb-ia CHAI PROJECT AXSHYA-i TB tashitak indang sangdongba bilemteta, par school kaketshir kati mozü magitetaka CHAI District Coordinator-i school nung iba tashitak indang sangdongba sülenbo lai maneni iba mozü agiba indang lemsatep.
Chang Tribal Tir, Nokshang Chang-ia TB agi shirangertemi RNTCP-i agizükba DOTS agiba ajanga pei taküm atema raratsü lemsatepba den külemi shirangertem dang, DOTS treatment tembanga agitsüla, kechiyong iba tashitak ya aneptsü akok, aser taküm anema litettsü, ta ashi.
Kasa sentong nung ANM Nursing students aser Kiudhan Tikhir Naga Incarnet Vocalist-ia ken ajanga shilem agi.