Tuensang town nung ango ayokba dokantem semzük

Tuensang, Yimpoksüi/November 02 (TYO): Tuensang Town Council (TTC) Administrator aser SDO (Civil) Tuensang, Pakon Phom-i tanü St. John ‘A’ Sector, Tuensang Town nung ango ayokba dokan semzüktsüogo, ta ketdangsertem osang ka ajanga metetdaktsü.
Tuensang jila nung ango ayoktsü atema dokan yanglutsüba atema Administrator-i Department of Fisheries & Aquatic Resources dang pelaba metetdaktsü.
Paisa nüburtem dang iba dokan nung local ngo ayoktsü aser merüka anepalutsü ayongzük.
Kasa sentong nung District Fishery Officer, Tuensang, Rongsenkumzuk-i, iba dokan ya 2017-18 küm atema NABARD (RIDF – XX) fund nungi yanglu, ta metetdaktsü.
Paisa nüburtem dang iba dokan kanga merüka anepalutsü aser ango dang ayoktsü metetdaktsü.
DFO Tuensang-isa, nüburtem atema department-i tang agi tasembuba ango ayokba dokan yanglutsür, ta metetdaktsü.
Item dokan yanglutsü atema ali tenla agutsüba asoshi pai ali kibur danga pelaba metetdaktsü.
Iba sentong ya HA, DFO Office Tuensang, Hanso Loyim Chang leniba nung agi aser Chang Baptist Church, Tuensang nungi Deacon, Loenba-i meshiteta sarasademtsü.