Tuensang yimtsüng nung FSPU ka semzüktsü

Dimapur, Luchii/December 10 (TYO): Ango antsü rezükdaktsüba unit (Fish Seed Production Unit) ka Tuensang yimtsüng kübok Thimlak, L. Khel nung Luchii/Dec 10 nü SDO (Civil) Tuensang, Pakon Phom-i semzktsüogo. Iba sentong nung District Fishery Officer (DFO) Tuensang, Rongsenkumzuk aser L. Khel Tuensang Village Council züngsemtem dena liasü.
Sentong nung o jembidang iba project takok ngua inyakba aser district kübok ango metsürtem tenüngdakba peridaktsütsü asoshi ango antsü rezükdaktsüba unit dak tali rangloker inyakba atema SDO-i DFO aser par telok tenüng asang.
Paisa, Iba dak sendakba aliba government department tem dang maneni nüburtem bendanga agüja tenzüktsü asoshi mepeshi aser district kübok tanga tesem nunga kasa project ya inyakyonga aotsü ajungshi.
Project indang rasaa ashidang DFO, Rongsenkumzuk-i ashiba agi, department of Fisheries and Aquatic Resources-i ango antsü rezükdaktsüba unit koba dang Chinese Eco-hatchery ajar, iba ya Rashtriya Krishi Vikas Yojana (RKVY) kübok Thimlak Government Fish Farm, Teunsang yimtsüng nung yanluogo. Paisa, FSPU ya district nung tang kanga nungdakba project ka lir aser Teunsang district nung mezüngbuba asütsü, ta ashi.
Maneni paisa iba project atema Director-i Tuensang District shimba atema pelaba lemstepba den district atema Thimlak Fish Farm amenokba nung teyari agütsüba atema L. Khel Chairman-i anir Village Council Members ajak dang pelaba lemsatepa liasü.
Iba sentong nung Village Council Chairman, B.Takum-i o tatsüka jembiba mapang Thimlak Fish Farm lapoktsü asoshi department-i teyari balala agütsüba atema parnok tenüng asang, ta Tuensang DPRO sangdong ka ajanga metetdaktsü.