Tuli College building tasenba semzük

Tuli (Mokokchung), October 02 (TYO): September 27, 2017 nü Higher Education & NBHM Government of Nagaland Advisor, Deo Nukhu-i Tuli college building tasenba semzüktsüogo.
Iba sentong nung pa tongti tesemdanger liasü aser CAWD & Taxes Parliamentary Secretary, Dr. Benjongliba Aier tetushi tejaoker liasü.
Kasa sentong nung Industries & Commerce & NIDC Parliamentary Secretary, Amenba Yaden, Tuli Sub division ADC aser EAC aser Tuli town nung Heads of the Department ajak dena liasü.
Tongti tejaokertem rongnungsa HOD Department of Geography Nagaland University, Dr. Sangyu Yaden aser Associate Professor Department of English, Nagaland University, Dr. Moanungsang nata liasü.
Tongti tesemdanger o jembidang Deo Nukhu-i akhidang pa nija school nung tesayur inyakba aser nija college tem nung timtem ajangshiba den item ama college nung kaketshirtemi timtem balala ajangshiba indang lemsatep.
Ajisüaka paisa, item ama tajangshibatem ajanga taküm nung nisung ka junga arangshitsü atema angazüker, ta ashi.
Paisa kaketshirtem dang meranga azüngtsü ajungshiba den adenshia alirtem danga iba college maneni renloktsü atema nungittsü ayongzüka liasü.
Tetushi tejaoker, Dr. Benjongliba Aier-ia shisaliok koda tongtibang, iba indang metetdaktsüba den külemi Mokokchung district nung ano college aika nüngdakba indang lemsatep.
Paisa kaketshirtem dang sorkar mapa dang mebushitsü aser tarutsü nung lokti nem khuret mebendenloktsütsü ajungshiba den külemi nükjidong tajung tur nendaka inyaktsü aser tensa mapang dak apet alitsü, iba den külemi tsürabur dak memetaloki alitsü ayongzüka liasü.
Sentong nungsa Amenba Yaden-ia, tanü college-i iba jenjang tashi tongtetba atema Board of Governors nem tenüngsang agütsü, ta ashi.
Kasa sentong nung Longpong ward committee Tuli Chairman-ia jembia liasü.
Iba sentong ya college Principal, Abdul Kabir Ahmed leniba nung agi, Tuli Lenten Baptist Arogo Pastor, Rev. C. Tongpang-i sarasadem aser Board of Governors of Tuli College Chairman, L. Lepzuk Lemtur-i lokti pelaa agizükba o jembia liasü.
Sentong nungsa Tuli College Administrator, I. Nukshi Jamir-i Tuli College nung terenok mapatem indang osang metetdaktsü, Tuli college nung kaketshirtemi ken ka aten aser Tuli Town Baptist Arogo Pastor, Rongsen-i tatembang sarasadem agia liasü.