Tuli nung Arju Autumn Fest akatsü

Dimapur, Luroi/August 30: Banquet Hall, Hotel Acacia Dimapur nung August 30, 2019 anogo Arju Autumn Fest ayonger aser artist temi benjongmung tula sayaba yangi noksa nung angur.

Dimapur, Luroi/August 30 (TYO): Saisapong aser kenten menüba tsütsü lanurtem pei sempet alima dang sayutsü aser ajungkettsü nükjidong yur sabang agüja, Community Educational Centre Society (CECS), Dimapur, Nagaland ajanga Mokokchung district kübok Rajeshwari Karuna School, Tuli nung Arju Autumn Fest Tuli, ta nüngja agütsür benjongmung tuluka October 10-11, 2019 anogotem nung ayongtsü renema lir. Iba sentong dak sendakba nung osangbener den senden ka August 30, 2019 anogo Banquet Hall, Hotel Acacia nung agiba mapang CECS Director Subonenba Longkumeri ashiba agi, iba benjongmung ajanga kin balala ka küma longjemdaktsütsü.
Iba benjong nung Volleyball aser Table Tennis asayaba den külemi indigenous games tabu 50 shi asayatsü, kong yimtsüng balala nungi kaketshirtem aser state telungzük nungi aser maneni temeket nung aliba state tem nungia arua shilem agitsü, ta pai ashi.
Saisapongtem dak alia iba benjong mapang Zip lining, ATV bike ride, Robe bridge, Paddle boat, Go Kart, Kids World aser Outdoor Camping amala katettsüsa sentong ayongertemi renema lir. Maneni iba Arju Autumn Fest mapang Incipit, Sunep Lemtur, Zuchobeni Tungo, Mengu Suokhrie, Toshimoa Jamir aser Imli K Imchen nungertem ama nüngtugu kentenertemi den külemi Dreamz Unlimited teloki shilem agiba angutsü.
Benjongmung ayungertemi ashiba agi, iba benjong ya ali tasazük acre 23 nung alitsü, aser chiyongtsütem jenjang talangba nung angutsü. Anogo ka asoshi entry fee nisung ka nung sen 300 alitsü aser arishi küm ter tekübok tanurtem entry fee malitsü. Anogo ana benjongmung mapang nikongdang 3:00 ako nungi 5:00 ako tashi local artist temi kenten menüba angutsü aser nikongdang 6:00 ako nungi Arju Battle of the Bands alitsü. Iba Arju Battle of the Bands nung shilem agitsüpurtem Dimapur nung September 03, 2019 anogo aser Tuli nung September 06, 2019 anogo audition agitsü, ta benjongmung ketdangsertemi metetdaktsü. Arju Battle of the Bands tetoktepba nung mezüng jenjang nguteter nem senpet sen 50,000 den sempetlep aser recording contract agütsütsü. Maneni tanabuba jenjang nguteter nem senpet sen 25,000 den sempetlep agütsütsü. Iba benjongmung tejangjaba metettsü aser osang ola agitsü asoshi www.cecsociety.org nung angutsü. Iba benjongmung indang event partners ji Task Force for Music & Arts, Tuli Administration, Dreamz Unlimited, Media 24 Studio, Music Dukaan, Live Master, Inkcraft Studio, Pencilwork Graphics, Graphic India, Arrow Club Tuli aser Creative Sound alitsü aser Northeast Live ya official broadcasting partner asütsü.