Tuli nung kaketshirtemi shishilembaba mapatem mit

Tuli nung kaketshirtemi dokantem mita aoba mapang parnok den yariteper GB tem aser Ao Kaketshir Telongjem Tuli lenirtem külemi tangokba noksa nung angur.  July 05, 2017.

Tuli, July 05 (TYO): Bodhbarnü Tuli town nung kaketshirtemi dokan tem nung oset aser chiyongtsütem shitak ayoker asü mayokerar ta mita aoba mapang tachitsü aser tagitsü mapang süir ayokba chiyongtsü aser osettem aika puteta rongdoktsüogo.
Kaketshirtemisa kasa anogo nung dokan purtemi amshiba seret dena shitak amshir asü mamshir ta reprangdangba mapang seret shitak mamshirtema putet aser ano karbo trade license dena meyanglushii shishilembaba mapa inyaka liasü. Item ozüng raksar aser nübortem ashioktsürtem nem tapet temerenshi agütsütsü asoshi kaketshirtemi parnok tenüngji administration nem agütsüogo.
“Item maparen ajak ya Tuli nung alirtem ajangzüktsü asoshi inyaker asünungji, nübortemi tarutsü anogotem nunga kaketshirtem mapa nung nungita yaridaktsüner,” ta Ao Kaketshir Telongjem Tuli nung ketdangpurtemi mepishia metetdaktsü.
Tarutsü nunga Tuli nung kaketshirtemi kaketrejutem aser government office nung inyakertem mapa junga asü mejungi inyakerar mita reprangtsü ta parnokisa metetdaktsü.