Tuli nung mirok keyi ka apu

Longpong mepu, Tuli nung mitkartemi shiki nung mirok keyi ka atembanga aliba noksa nung angur. July 11, 2020.

Tuli, July 11 (TYO) : Tuli town nung tawa mirok keyi ka adoka kiset shiruru azü, ak, nashi aser danü dena nguseta chitsüba agi, yangji alir lanurtemi mita lir, kiyiji yasüng Hokolbar aonung shiki ka nung atembangtetogo.
Iba kiyi ya Tuli nung Longpong mepu nung alir mitkartemi pua lir aser ibaji Nagaland Wildlife department nem agütsütsü telemtetba agiogo. Parnokji arua bener mao tashi kiyiji mitkartem den Forest department nung Tuli division purtemi yaritepa nükdagi ta Longpong Ward Committee osang ka ajanga metetdaktsü.
“Nübortem taküm kümzüktsü aser rongsen tsütsüa makoksadaktsütsü asoshi pei taküm ajak bendanga agüja inyakba asoshi mitkartem dang kanga pelar aser parnok nem nübortemi tenüngsang agütsür,” ta Longpong ward Committee purtemisa metetdaktsü.