Tuli nung RD Block office lapoktsü

Tuli (Mokokchung), Rongjui/September 29 (TYO): Tuli block nung Rongjui/September 28, 2018 nü RD officials aser Tuli kübok aliba yimtsüng 11 nungi council züngsemtem densema Director of Rural Development, Imlimeren Jamir-i RD Block, Tuli office building tasenba lapoktsüogo.
Iba office building lapokba sentong nung Imlimeren-i o jembiba mapang ashiba agi, terenlokba mapa inyakyim balala nung nüburtemi timtem ajuruba ajemdaktsütsü nükjidong nung 2012 küm Aenjeti/January 20 nü State Sorkari Tuli nung iba RD Block amenokja liasü.
Ajusüaka, office tajung ka meliaka iba block masamai aruogo aser tang building tasen ka lapoktsüba ajanga office maparentem tajungba nung takok ngua nungshia bener aotsü, aser kasa mapang nung RD block, Tuli nung staff temi parnok nem nüngloktsüba mapatem junga achayanga takok ngua bener aotsü ta, Imlimeren-isa teimla agütsü.
Maneni, Tuli tesem libajen, ali temo aketba, senzüsenpongtsü atema temela aser state kübok jila rongnung kanga dang kara renloka aoba nung ajemdaker, terenlokba mapatem atema tejaklen sür iba block kübok yimtsüngtem tsüngda timi tangatetep nung aser longjema teka amtepa inyaktsü asoshi Meren-i tayongzükba agütsü.
Paisa, senotsü dak ajemdaker maparentem takok ngua amenoktsü asoshi sentong nung adenertem dang yimtsüngtem atema tapet scheme tem bushitsü atema ayongzüka liasü.
Kasa sentong nung ADC Tuli, Imsongmeren Imsong-i sentepa alirtem den jembiba mapang pai ashiba agi, office ka nung inyakyim tongtibang kaji record ayubaji lir. Paisa centre nungi aruba senotsü teyaritemji angutsü temalabo masü ta lepshia metetdaktsü; iba den külemi yimdak yimsüsürtem dang senotsü kanga shishaka amshitsü asoshi mepishia liasü.