Tuli paper mill atema endokba senotsü bushisüngdangtsü akanger

Dimapur, Jan.16 (TYO) : Tuli paper mill tanaben shia arudaktsütsü asoshi India government-i agütsüba sen shitak mamshiba ajanga tanü tashi paper mill shia marudaktsütetba tia ngua nübortem ajangzükdaktsütsü asoshi inyaker Wb.I.Chubatangit Jamiri Ministry of Heavy Industries & Public Enterprises aser Nagaland Chief Secretary nungertem dangi item senotsü endokbaji bushisüngdangtsü atema tezüluba nung takangba ka agütsüogo.
Pai tamalen RTI ozüng ajanga meshiba osang nung metetdaktsüba agi, Tuli paper mill shia arudaktsütsü asoshi 2007 küm July ita nungi 2009 küm April ita tashi nung endokba sen ajak agi lakh 3675.56 liasü aser ano iba sülen 2007 kümsa September ita nung sen crore 54.60 agütsüba kuli tejangja lir. Ano, iba sülen India government-i kasa Tuli paper shia arudaktsütsü atema mapa tenzüktsü asoshi sen crore 100 agütsü saka iba sen nung jagi paper mill reprangba telok Hindustan Paper Corporation-i Tuli paper mill atemabo sen crore 40 dang agütsür tanüngba sen crore 60 magütsüi parnoki tanga nüngdak nung amshiba asoshi Nagaland government-i dena 2016 küm India government dangi iba senji agütsütsüla ta zülu saka tang tashi telangzüba tajung mengui lir.
Iba ama tia ka nung Nagaland nung industry ka dang anünga aliba shia marudaktsüteti takoksa angur aser paper mill nung imyakertem dena tangutsü timi mengui timatemer asünungji, tang tashi nung paper mill shia arudaktsütsü atema endokba senotsü ajakji Central Investigating Agency ka ajanga bushisüngdangtsüla ta Chubatangitisa takangba shidi ka center aser state government na nem dang masü saka Hindustan Paper Corporation Limited nung mendenbuba aser Nagaland Pulp & Paper Company Limited nung Chief Executive Officer (CEO) na nem agütsüogo.
Parnok nungi telangzüluba tajung ka mengura kasa ken o ya okadak benoktsü ta paisa ashi.