Tuli Paper Mill Melapoktettsü

Tamalen iba osangkaket ajanga Tuli paper mill shibangtsüba osang metetdaktsüba ama, tangbo joko asenoki anganüyonga manganüyonga iba paper mill ya teti atema shibangtsüsa tatembang kati arudagi. Taoba hopta July 2 nü Lok sabha tatar senden nung Nagaland tatar Wb.Tokheho Yepthomi-i asüngdangba ka langzüa ashidang,  Heavy Industries & Public Enterprises repranger Union Minister, Wb. Arvind Ganpat Sawant-i Hindustan Paper Corporation Ltd. (HPC) ya anenadoktsü asoshi National Company Law Tribunal (NCLT)-i telemtetba agütsüogo ta metetdaktsübaji, asenok asoshi Tuli paper mill shibangtsüba osang tejangja ka asütsü. NCLT ya linük nung company-tem dak aketba mapa aser ken o angadanga o bendangtsürtem lir. Parnoki HPC dak aketba ken o taküm 2019 küm May 2 nü to angadangogo aser HPC shibangtsü asoshi telemtetba agütsüogo. Tuli paper mill ya HPC kübok lapokba mill ka lir. Atangji, Tuli paper reprangtsüba ya HPC kija masü saka state government dena lir. Ajisüaka, state government shilembo tilaka dang lir, anungji sentsüa aser tagitsüa HPC meyong amai dang asütsü. Tuli paper mill lapokli nungi imlaba ama paper memenüngtet, anungji 1992 küm nungibo paper mill nung paper menüngba mapa anenadok.  Mapabo meinyaker saka inyakertem nembo ita sen agütsür ta küm ishika arur külen oda odabo inyakertem nema ita sen magütsüteti timatemba tensa tia ajuruba asenoki nguogo. Atangji, state government-ia aser lokti tentettemia iba paper mill meshibangi tanaben lapokshitsü asoshi aiben kanga meranga jembiogo. Iba jagiang ken anabenkabo center government-ia Nagaland nung aliba paper mill yabo meshibangi tanaben shia arua lapoktsü atema sen-a crore 500 bo agütsüogo. Ajisüaka, iba senjia HPC-i belenzüka bener orr tanga nüngdak nung amshiba agi Tuli nung paper mill tanaben tenzükshitsüba mapa metenzüktet aser asenokia iba senji mebushitet. Ibai company ka nem state government mezüngmeshidaktsüba mapa ka liasü. Shitakba agibo, Tuli paper mill-ji lapokang telapok, Tuli paper mill atema aruba senji Tuli paper mill atema amshitsüla, ajisüaka tang tashi iba senji HPC-i kong kechi atema amshiar asenoki memetet ser Tuli paper mill ya shibangdaktsütsü. Tesasatsükaji, iba ama Naga nunger akoksadaktsütsüsa inyakba ken o ya Nagaland tatar senden nunga benoka süoki ia jembiba mangashi. Nagaland state kümer Nagaland nung lapokba industry tulubo Tuli paper mill ya dang liasü, saka kenüa  bilemba ama paper mill ya lapoka meinyakteti anen aser tangbo tanaben shia arudakja lapoktsübo otsü maka kümogo. Asenoki komaka merangdangyonga joko melapoktettsüsa akümbaji Tuli paper mill reprangba company HPC anenadoktsü. Iba jagi HPC kübok aliba paper mill ajak anenadoktsüsa akümer. Joko, asenok asoshi lenmang ana dang lir, ibaji ka Tuli paper mill ya nisung kari alizüker lapoktsü asü (?) mesüra paper mill melen tanga industry-ang ka tenzüktsü. Iba shisabolu onük ya state government nung sentong yanglurtemi benoka jembitsüla.  Atangji, HPC shibangba agi Tuli paper mill shibanger ta asübaji Nagaland asoshi alima tatembang ka atonger ama masütsüla. Tanübo government-i industry mesüra factory lapoka nisungtem mapa nung aniokba putu masü saka nisungtem (private)-iang industry tapu balala lapoka aoba aser terenlok mapatema inyakba putu lir, anungji government yabo kibur masü saka teyarir-ang ka lir. Government mapaji gari lenmang lapoktsütsü, light agütsütsü aser tanükertem yoktsü. Item dakji alaka alima memenentsüsa aser nübortem makoksatsüsa inyaktsü asoshi temzüng ozüng kar latettsütsü. Ibaji kodang asenoki angateta inyakdir, tang Tuli paper mill ama shibangdangji, iba melen government-i kechi agütsütsü ta bilemtsü melen asenoki asenoksasa Tuli paper mill melen kechi tajungba asütsü ta shisadangtsü tenzüktsü. Atangji, asen kijaibo shisa agi matongtsüa akok, anungji iba ama mapang nung tangar tashitemetetter aser tajangshirtem bushia oagi shisa meshia lenmang asüngdangtsübaji kanga tenüngdaktsü asütsü.