Tuli paper mill ya akok tashi shia arudaktsütsüla : T.N.Mannen

Dimapur, Sept. 20 (TYO) : Tang Tuli paper mill shia arudaktsütsü asoshi mapa tenzüka aliba ya tamakok angu nungbo, joko kodanga shia marudaktsütettsü aser iba tashi merangdanga arur nisungtemi shitak meinyakba agi tamakok angubaji kanga junga lapoka otettsüba industry ka tia mejungi südaktsür asütsü, anungji tang yabosa shia arudaktsütsüsa akok tashi merangtsüla ta Wb.T.N.Mannen IAS (Rtd)-i metetdaktsüogo.
Pa ya Nagaland nung Additional Chief Secretary liasü aser mapang kabo NPPC Ltd nung mendenbuba liasü.
Wb.T.N.Maneni ashiba agi. Tuli nung paper mill 1982 küm lapokba ya telemtetba shitak ka agia inyakba mapa ka liasü. Iba ya ajanga nübortem mapa tapu balala inyakdak ngua rongsenren nung kanga junga renloka aotsü lenmang kanga sadema liasü saka, tia majung, light tashi peria mengutetba, nisung tamajungertemi timtem agütsüba, mapa inyakertemi mapang shitak amshia mapa shitak meinyaktetba aser yimten lenirtemi tali amushiba kulitem ajanga 1992 kümbo shibangtsüsa aküm.
Ajisüaka, tang mapang talangka lir külen Tuli paper mill shia arudaktsütsü lemtetbaji NPCC aser Naga nungertem asoshi temoatsü lenmang lapoker asütsü, kechiyong Tuli paper mill lapokshiba ajanga zünger aser mazüng alir lanurtem aika pei pei yari mapa ngua inyaktsü aser aluyimertema süngküm ayokba agi tajangzük ngua anisüngzüka alitsü ta paisa metetdaktsü.
” Item anogo tajungtem ajakji yimdangi arua September 11 nü to Tuli paper telongi ia ken semdangogo saka idangji truck gari aika nung paper mill nung agitsüba oset oshir anendena angu aser ibaji oset jenjangji sen magütsüba agi oshizüka magütsür ta ashiba angashia kanga süngmanga jashia bilemogo,” ta T.N.Mannenisa metetdaktsü.
Tuli paper mill ya shia arudaktsütsü asoshi 2013 küm lemtetba sülen, iba kümsa July nung center sorkari sen crore noklangka agütsü. Iba senji HPC office Kolkata nem Escrow Account ka NPPC tenüng nung lapoker amshitsü tetuyuba agütsü aser iba senji tanga nüngdak nung mamshitsü saka Tuli paper mill asoshi dang amshitsü atema CMD of HPC nem nungloktsü. Iba sen nung jagi August 2015 tashi nung sen crore 40 amshiogo ta angazüker, anungji tanüngba sen crore 60 jagi tang bener arua aliba osettem indangji sen agütsütsü melen, joko Tuli paper mill asoshi sen mali kümogo ta CMD, shiba tang MD, NPPC kümer lir, pai ashibaji meimlaba tesüngmangtsü osang tamajung ka asütsü ta T.N.Mannenisa ashi.
Ano, tang Tuli paper mill ya yanglushia shisa arudaktsütsü asoshi sentong reprangshir sen crore 489 agütsütsü asoshi taküm 2015 January ita nung renemogo aser idangjibo ita November 2016 tashi nungbo paper mill tanaben lapoktsü ta anogo dena latet saka tangbo ano paper mill renemtsüba anogoji November 2017 tashi ogo. Ano, tang inyakba yimya nung CMD (HPC) -cum- MD, NPPCL leniba nung inyaka aonungbo 2017 küma merenemtettsü ta paisa metetdaktsü.
HPC ya HPPCL nung tongtibang telok ka lir aser teyari asoshi yokba sen ajak pa ket nung dang yudaktsür, saka pai yamaji meinyaker, anungji tang ama timtemji ajurur ta paisa metetdaktsü.
Iba ama timtemji majurui mapa takok ngua inyaktsü asoshi Tuli paper mill atema MD balala shimtsüla aser Nagaland State aser HPC na pronglai pei tata shilem mapang shitak nung agütsütsüla ta T.N.Mannenisa metetdaktsüogo.