Tuli Sub-Division kümer küm tenem jungogo

Tongti Ancha Minister Temjen Imna Along-i Tuli Town hon jubilee amungba nüngtem yangluba nüngshilung ka Tuli ADC office kima lapoktsür külen tongtibang nisung kar noksa nung angur. Tuli, Nov 2, 2018.

Tuli, Nov 2 (TYO): Nagaland sorkari 1968 küm Tuli town administrative sub-division jenjang agütsür külen küm tenem ajungba hon jubilee sentong tulu ka yangi Tuli Town Hall nung ayongzüka mungogo.
Iba sentong nung Tongti Ancha Minister for Higher Education & Technical Education Government of Nagaland, Temjen Imna Along-i mapang tatsüka agia jembidang, Aor ya mezüngpur ta Naga nungeri züngshir, Naga nungeri asen kin dak kanga rangloker, anungji, iba ama tensa ka nung “asenok asoshi temelenshi ya kanga nungdaker”, ta ashi.
Paisa Tuli aser temeket nung alirtem dang temepishiba olen ka ashidang, libaliru, jembishinüba aser inyaksangshiba mapa ajak nung khuret aliba senso kaka akümtsü asoshi tayongzükba ka agütsü.
Tanep jubilee sentong metenzükdang Tuli ADC office Complex nung jubilee nüngtem azüngba nüngshilung ka Tongti Ancha, Temjen Imna Along-i akhümketa lapoktsü aser iba nüngshilung meshiteta Tuli Town Baptist Arogo Pastor, Rongsen-i sarasadem.
Tuli town hon jubilee nüngtem tarutsü nung inyaka aotsü bangzüng kar renema ayu. Item rongnung mezüngbubaji; Langpangkong Tzükong Mungdang-i bangzüng renemba Tuli ADC Head Quarter nungi D.C Head Quarter ajungkettsü asoshi inyaktsü lemtetba nungji Tuli town nübur ajaki iba nükjidong atongtsü asoshi nungdakba maparen ajak nung yariteptsü lemtet.
Tanabuba aser tasembubaji; Tuli nung Treasury office ka asoshi DPDB ajanga Nagaland sorkar den tongteprateptsü aser Community Health Centre jenjang nungi Civil Hospital jenjangi ajungkettsü asoshi inyaktsü lemtet.
Pezübuba nung; Tuli nung netsüng aser kibong renloka aoba ama Tuli town nung ward telemsa renloktsü asoshi inyaktsü lemtet. Pungububa nung; Tuli town ya yimti tuli (metro city) ka kümdaktsütsü asoshi temeket aliba linüktem bendenloka inyaktsü aser iba maparen asoshi ‘concern Ao teintet roko senden’ nem nongloktsütsü lemteta liasü.
Trokbuba nung; Mariani nungi Amguri ajanga Tuli train service ya Tuli nungi Dimapur tashi jajatettsü atema inyaktsü aser iba maparen asoshi ‘concern Ao teintet roko senden’ nemsa nongloktsütsü lemtet. Item bangzüngtem mapa küma achayanga aotsü atema tapet luden ka shimtsü lemteta yuogo.
Jubilee amungba nüngtem nung adokba nüngo kaket ka MLA & Adviser, Imnatibai maongka agia sayatsü. Sentong nung Merangkong, Kangtsüng aser Wameken village council nungi yimsüsürtemi tepela o tatsütsü lemsatep. Tuli ya item yim asem lushi kübok mesema lir.
Tuli Assembly Constituency MLA Amenba Yaden-ia mapang tatsüka agia tepela o den tayongzükba o tulu bener arua tesentepertem ayongzük. Tuli ADC, Imsongmereni tarur pelaa agizükba den Tuli Town Golden Jubilee planning committee convener, S. Sendong Ao-i melepzüng o jembia liasü. Jubilee choir-i tesentepertem saksalemdakja ken tajung ana aten. Tuli Lenden Baptist Arogo Pastor Rev. C. Tongpang, Tuli Town Baptist Arogo Assoc. Pastor (W) Rev. Mapula aser Aitlenden Baptist Arogo Pastor Anungba parnoki sarasadem balala ajanga shilem agia liasü.
Tanü iba sentong nung Ao Senden, Watsü Mungdang, Ao Kaketshir Mungdang, Tzükong Mungdang balala nungi meyongertem aser Tuli town aser temeket nung aliba yimtsüng aser town balala nungi netsüng nübur aika adenshia iba sentong kanga meraketa lirepatsüka munga liasü. Jubilee nüngtem nung nikongdang sempetlepsalaba sentong balaka ka agia liasü.