Tuli town council atema nomination file asürtem ajak Ao Sendeni jaoker

Ao Sendeni anir Likapur aser All Ward Union Mokokchung Town nung ketdangsertemi Municipal election nung nomination file mesüdaktsüi nokdanga amungba noksa nung angur. (Mokokchung January 05, 2017).

Mokokchung, January 05 (TYO): Nagaland Municipal & Town Council election nung nomination file masütsü Ao Sendeni nokdanga aruba mapang, Ao Sendeni lemtetba anema tashi mangai Tuli Town Council atema shirnokisa nomination file süogo, parnok ajak January 6, 2017 anepdang 10:00 ako nung Senden office-i jaoka lir, ta Brihostibarnü osangbener senden ka nung Ao Senden ketdangsertemi metetdaktsü.
Tanü agi anogo asemnübuba Mokokchung D.C office anasa Ao Sendeni anir Likapur yim asem nungi aser All Ward Union Mokokchung Town (AWUMT) ketdangsürtemi Mokokchung Municipal Council atema nomination file mesüdaktsüi nokdanga arudagi.
Jan 6, 2017 nungi ano iba nokdangba tali tashi taitba nung aotsü atema nübo talila arusemtsü, ta Ao Senden ketdangsertemisa ashi. Iba den ano Ao Kaketshir Mungdang (AKM) den Mokokchung Town Lanur Telungjem (MTLT) nata iba nokdang nungji arua shilem agitsü sentong lir, ta parnokisa shisem.
“Nagaland Municipal aser Town Council election nung Aotsür/Aor chanu shibai Aor sobaliba temeten anema nomination file südir, sobaliba temzüngi melaba ama Ao Senso nungi jendoktsü,” ta Ao Sendeni telemtetba agia lir. Aji saka, Ao Senden lemtet anema Tuli Town Council atema parnok 9-i nomination file süa lir.
Jan 5, 2017 nungibo D.C Complex nung nija gari kata marudaktsür, ta osang angazüker. Nomination file asüba maparen ya Jan 7 tashiji anepdang 11:00 ako nungi nikongdang 3:00 tashi alitsü.
Mokokchung district kübok Tuli town council atema candidate 9-i nomination file asüba dak alaka Mokokchung town, Changtongya aser Mangkolemba nungbo shingaia tenüng agütsüba osang mangazüker.