Tunisia nung Emergency ozüng benoker

Tunis, November 25 (Agencies): Tunisia yimtiba, Tunis nung pokshiba lendong tesashi ka yashi Mongolbar nü atalokba sülen Tunisia Tir, Beji Caid Essebsi-i par linük ajunga nung emergency ozüng benokogo.

Presidential guard mitkartem aniba bus kati yashi Tunis yimti tiyongtsülen pokshiba lendong ajuru aser iba lendong nung ishiba agi nisung 12 tashi asüba osang jangjaogo.

Yashi lendongji bus gari nung pokshiba oset alenoktsüba ajanga asü meta nungi pokshitsü injang kalokja ataloktsü iba osang tang tashi mejangjateti lir.

Ano, tanü lendong atalokdaktsüba atema telok shingia tang tashi nung tenüng agia mali.

Yashi lendong atalokba sülen Tir, Essebsi-i par security council senden ka jatep aser par linük ajunga nung anogo 30 atema emergency ozüng benokba den külemi, aonunga curfew alitsü ozüng benokogo.

“Tunisia-i kiralongrar den sentakba tongpang raratsü tenzükogo aser kiralongrar madak takok angutsü ta Tunisia nüburtem dang nangzüker. Iba den sentakba maparen nung alima linüktemia Tunisia den amaliteptsü ajungshir,” ta Essebsi-i yasüng television ajanga metetdaktsü.

Ano külen, United Nations Secretary General, Ban Ki-moon-ia yasüng lendong atalokdaktsüba atema aitsüba aser Tunisia sorkar den maneni amaliteptsü tenangzükba olen ka metetdaktsüogo.

Tunisia sorkari Tunis yimtiba nung tensa azüoktsü asoshi par mitkartem toaba mapang nungi timba yoka duty inyakdaktsütsü tenzüker anogo 10 buba nung tan lendong ya ataloker lir.

Tunisia police ketdangsertemi Tunis yimti nungi southeast tsütsüleni kilometer 150 shi pilar, Sousee yimti nung tentetba police station aser hotel balala nung lendong ataloktsütsü sentong atongba telok ka tan November ita tetenzüklena apuba osang jangjaogo.

Kiralongrartemi Sousse yimti nungsa tentetba hotel ka nung anenzüka alir ishiba agi nisung 38 tashi yaküm 2014 küm June ita tepsetba osanga bushiteta lir.