Tunisia’er National Dialogue Quartet-i 2015 Nobel Peace Prize agizüker

2015 Nobel Peace agizükertem, (Abelen nungi achijileni tarensena) UGTT Secretary General, Houcine Abbassi; UTIC Tir, Wided Bouchamaoui; LTDH Tir, Abdessattar ben Moussa aser Tunisa nunger okatsür, Fadhel Mahfoudh nunger noksa yangi angur. (Olso, October 09)

 Olso, October 09 (Agencies): Tunisia nung democracy yimsüsütsü yimya maneni benshitsü asoshi bendanga agüja inyaker, National Dialogue Quartet (NDQ) tentet nem 2015 Nobel Peace Prize agütsütsü renemba osang ka Nobel luden mendenbula, Kachi Kullman Five-i tanü Hokolbar nü metetdaktsüogo.

“Arab lima nung Arab Spring longkak aitsüren tenzükdak, Tunisia nung ‘Jasmine Revolution’ longkak aitsü sentong 2011 küm agiba sülen par linük nung democracy yimya maneni benshitsü asoshi bendanga agüja inyakba nüngtem nung NDQ nem 2015 Nobel Peace sempet agütsütsü lemtet,” ta lai ashi.

Tunisian General Labour Union (UGTT); Tunisian Confederation of Industry, Trade & Handicrafts (UTICA); Tunisian Human Rights League (LTDH) aser Tunisian Order of Lawyers nungeri 2013 küm NDQ tentetba osang jangjaogo.

Aji oda, tan Nobel Peace sempet agizüker rong nung UGTT Secretary General, Houcine Abbassi; UTIC Tir, Wided Bouchamaoui; LTDH Tir, Abdessattar ben Moussa aser Tunisa nunger okatsür, Fadhel Mahfoudh nunger densema lir.

“Tunisia nung lendong tulu adoktsü tenzüka par nübur rong nung telok balala küma tongpanga raratsüsa tensa tamajung ajuruba mapang nung NDQ-i yimji yimjung tensa bener arutsü aser iba yongji par tentet nem 2015 Nobel Peace sempet agütsür,” ta Kullman-i ashi.

Par linük nung küm aika yimsüsür ka kijai yimsü asübaren aser ochimashi inyakba maparen agientsü nükjidong nung Tunisia nüburtemi yimti yimdong nung longkak aita par Tir, Zine el Abidine Ben Ali yimsüsütsü menden nungi tashiyim agi agiena liasü.

Taküm agütsütsü renemba Nobel Peace sempet agizüktsü asoshi tenüng benoker rong nung Catholic tamangba yimsü lenisang, Pope Francis aser Germany Chancellor, Angela Merkel na densema kija aser tentet 273 tashi aliba osang jangjaogo.