Tunisian-i Saudi crown prince magizüker

Tunis, Yimpoksüi/November 24 (Agencies): Saudi Crown Prince Mohammed bin Salman-i (MBS) Tunisia semdangtsü aliba sentong, politician aser lokti tentet balala aikati memulungba metetdaktsüogo.
Saudi nunger osangbener Jamal Khashoggi tepsetba sülen Prince Mohammed tang mezüngbuba bendanglen sema senzütsü asoshi sentong yanglua aliba nung Tunisia semdangtsü aliba yaa shilem ka lir.
Tunisia sorkar otongdar Saida Qarash-i, Prince Mohammed-i par linük Yimpoksüi 27 nü semdangtsü aliba osang local radio station ka ajanga sangdongogo.
Mohammed, Yangtepnü Abu Dhabi tongogo aser pai Bahrain aser Egypt densema iba tesem nung aliba linüktem semdangtsü, kong pa pela shishia agizüktsü.
Maneni pa iba ita tatemi Argentina nung G20 Summit nung adentsü kong pa alima nung lenirtem den ajuruteptsü aser parnok rongnung Turkey tir Recep Tayyip Erdogan densema lir, shibai Khashoggi tepsetba ken o nung Mohammed aitsüogo.
Qarash-i ashiba agi, Tunisia-i, Khashoggi tepsetba aitsü aser parnoki ochiba yimjak nung metetdaktsütsü akhanger.
Tunisia nunger activist aser taoba al-Irada party lenir Tarek Kahlawi-i ashiba agi, crown prince aruba anogo nisung noklang aika Carthage nung tir aliba ki kima sentepa longkak aittsü imlar.
Kasa mapang nung opposition Popular Front party otengdar Hamma Hammami-ia, MBS-i par linük semdangtsü aliba anemogo, aser ashiba agi iba sentong ya Tunisia nunger taginüba anema lir.
People’s Movement party lenir Emad Al-Daimi-ia Facebook post ka ajanga bin Salman Tunisia arudaktsüba ya aibelen ka lir ta Tunisia tir Beji Caid Essebsi amokmerenogo.