Tura SBI ATM nungi sen lakh 41 auya

Tura, October 18 (Agencies): Mongolbarnü bank ka auyaba temai adokba sülen ghonda 24 tsüngda nung maneni Bodhbarnü Tura nung ano bank tanga ka ayuaba osang angazükogo. Osang ajanga ashiba agi, SBI Tura Super Market ATM nungi sen lakh 41 tanep auyar ao.
Temetettsü kaji yashiang Phulabri anasa Tura nungi bank manager ka ket nungi sen lakh 25 auyar oya lia nisung ana puogo. Ajisüaka tanü tatalokba nungyabo telung nung alir kar densema alitsü, ta temolung melemi bilemer. Police temi ashiba agi, ATM mesera sen ayudak vault kakpoker aiba temaitsü kecha mali.
Police nungi osang ka ajanga ashiba agi, bank ketdangsertemi yasüng ATM nung sen lakh 25 inoktsüba metetdaktsü. Iba den külemi ajak senteper iba ATM nung sen lakh 43 liasü. Ajisüaka bank ketdangsertemi ashiba agi, parnoki iba ATM nungi sen auyaba ya tanep 11:30 nung ang meteta aru.
“Onoki temolung melemi bilemba parnok nisung pezü lir aser osang tejangja atatar,” ta superintendent of police, West Garo Hills, Dr MGR Kumar-i ashi.
ATM tem nung sen inoktsüba atema teyari agütsüba contractor, SIS Securities pur daka temolung melemi bilemer.
Police-i iba ATM ya semdangogo aser finger prints agizükogo. Parnoki maneni ken bushisüngdangba nung teyari agitsü atema CCTV footage dena meshiogo.
“Machine ya username aser password amshia lapok amai reprangteter kechiyong kakpokba mesera kangshia lapokba temaitsü kecha mali. ATM anasa sen lakh 1.5 tsüka aliba ngutetogo aser iba ajanga auertem iba tesem nungi jena aotsüba kanga ariteba liasü, ta angateter. Osang ajanga ashiba agi, sen lakh 41 shi auyarogo,” ta Police osang ka ajanga metetdaktsü.
Iba ken o dak sendakba nung jembidang Garo Hills, SBI, AGM-i ashiba agi, SIS ya ATM kibur lir aser iba ken o police nem metetdaktsüogo. “Onoki sen kwi samara züngdangdar aser osang agütsüba ama kasashi asütsü. CCTV footage dak sendakba nung teyari agütsütsü asoshi Guwahati nungi engineer ka atudar aser iba ajanga ken o jangjatsü,” ta AGM-i ashi.