Turkey anema tenokdangba sentong tasen benokshitsü: Putin

Moscow, December 03 (Agencies): Russia-i Turkey linük anema tenokdangba sentong tasen benokshitsü renemba osang ka Russia Tir, Vladimir Putin-i tanü Brehostibar nü metetdaktsüogo.

“Turkey-i ozü jet tayimtsü anüng tom nungi kazüka yokbaji tongpang raradang ozüng alema inyaker lir,” ta shia, yamaji inyakba atema Ankara merenshitsü nükjidong nung par linük anema tenokdangba sentong tasen benokhitsü asoshi Kremlin-i renemogo ta pai ashi.

“Russia-i taoba November ita 24 nü tayimtsü anüng tom nungi kazüka yokba tatalokbaji kodanga mamadoktsü,” ta shia, par tayimtsü anüng tom nungi kazüka yokba ken o nung ajemdaker Turkey den tongpang raratsübo bilema mali saka par linük anema tenokdangba sentong tasen benokshitsü lemteta lir ta Putin-i tanü jangjashitsü.

“Turkey mitkartemi ozü tayimtsü kazüka yokba den külemi, ozü senso 2 tashi tepset. Anungji, par linüki yamaji inyakba atema sasa bilemtsüla,” ta Putin-i kanga jashia ashi.

Ano, Russia-i par tejashiba sayutsü nükjidong nung Ankara den Turkish Stream gas pipeline mapatong den sentakba senden ka danga manentsü lemtetba osang ka Putin’er Energy Minister, Alexander Novak-ia tanü sangoktsü.

Putin-i tanü iba olenji sangoktsüba ajanga par linük ana tsüngda mangatettep ken o agiena sendaktepshitsü teimla ajunga samadaktsür lir.

Ano külen, Turkey-ia par linüki Islamic State (IS) kiralongrartem den tesendaktep tajung yanglua lir ta Russia-i aitsüba onük magizükba olen ka tanü metetdaktsüogo.

Turkey-i par tayimtsü kazüka yokba sülen anogo 9 tashi nung Turkey lenisang, Erdogan-i Russia dang taidok memeshiba atema Putin aser pai aniba Russia sorkar kanga dang jashidaktsüba osanga angazükogo.

“Ozü lushi telungi temelaba magi atiba yong ozü mitkar tayimtsü anati Russia’er SU-24 jet tayimtsüji anüng tom nungi kazüka yok,” ta Turkey-i par mitkartem metentsüogo.

Ajisüaka, par tayimtsü Turkey lushi telungi mai ta shia, Russia-i Turkey’er inyaksangi kanga sashia aitsütsü tenzüka par linük ana tsüngda tang tesendaktep kanga mejungi kümogo.