Turkey aser Israel linük na tanaben sentaktepshiogo

Ankara, June 27 (Agencies): Israel aser Turkey linük nati tanaben sentaktepshia, par linük ana tsüngda küm 6 shi tesendaktep mejungi alibaren agientsü tenzükogo.
Turkey linük den tanaben sentaktepshia aka, par linüki Gaza Strip nung benokba tenokdangbaren magientsü saka par Israel tzüyimkümlen ajangdanga Gaza Strip nung alirtem nem nungdakba chiyongtsü aser teyari osettsüsettembo agütsüdaktsütsü lemtetba osang ka Israel Ato Kilonser, Benjamin Netanyahu-i tanü, Hombar nü metetdaktsü.
Ajisüaka, par linük ana tsüngda tanaben sentaktepshitsü lemtetba sülen Gaza Strip nung benokba tenokdangbaren agientsü asoshi Israel-i mulungba olen ka Turkey Ato Kilonser, Binali Yildirim-i Ankara yimtiba nung osangbener den tanü ajurutepdang metetdakja liasü.
Turkey-i Gaza Strip nung timtema alir nüburtem atema yokba teyari osettsüset aser chiyongtsü abenba rongtem Israel-i pua ayuba sülen 2010 küm nungi tenzüka Turkey aser Israel na tsüngda tesendaktep mejungi akümtsü tenzük.
Israel-i teyari osettsüset abenba rongtem apudang Turkey nunger nübur temeten asoshi nokdaker nisung 10 shi tepset.
Yamaji atalokba sülen, Israel-i temonok sen agütsütsü aser Palestine lushi tonga motettsüsa tenokdangbaren benokba maparen agientsü takhangba Turkey-i benoka liasü.
Aji oda, tan tanaben sentaktepshitsü lemtetba sülen Israel aser Turkey naprongi par ambassador-tem tekaratiba mapang nung yoktsü renemogo.
Ano, mozüki ka aser power plant tasen ka yanglutsü densema, Turkey-i Gaza nung teyari agütsütsü mapatong ishika inyaktsü tezüngzüktepa tan par linük anati agiogo.