Turkey bomb lendong ajanga EU ketdangsertemi semdangtsü aliba thinen

Brussels, October 11 (Agencies): Ankara, Turkey nung yimjung rally sentong akaba mapang tapoktsü tesashi ana poka tajemba agi nisung 95 asü aser nisung 160 shi yiruba ajanga sorkari linük nung asemnü mangyima amungtsü sangtongba sülen European Union (EU) ketdangser tain anati linük semdangtsü tamalen nungi sentong yanglur aliba thinenogo.
Taoba hopta EU Commission Tir Jean-Claude Juncker-i Brussels nung oa Turkey Tir Recep Tayyip Erdogan den refugee tebilemtsü kar lemsatepba nung tangatettep kati arutsü asoshi EU-i mezüng tatong Tir Frans Timmermans aser EU commissioner for enlargement, Johannes Hahn na shimteter Turkey semdangtsüba liasü.
“Tanü Ankara nung lendong atalokba ajanga linük nung asemnü mangyima amungtsü lemtetba metetdakja item anogo ya aitsür tanga mapang ka nung semdangang ta Turkey ketdangsertemi mepishiba agi iba sentong thinena atar,” ta Honibar nü European Commission sangdong ka ajanga metetdaktsü.
“Onoki iba lendong nung taküm samar kibongtem den asüku lemsateper aser yirur alirtem tekaraba nung tajungba akümtsü sarasademtsür. Iba ama tejashi tensa ka nung onoka Turkey sorkar aser nüburtem den lir. Tan semdangtsü aliba ya taruba Bodhbar, October 14 nü asoshi thinena atar,” ta sangdong ajangasa ashi.
Brussels nung oa October 5 nü Jean-Claude Juncker aser Erdogan na ajurutepba mapang Juncker-i Syria aser tanga linüktem nungi Europe-i refugee aitba tebilemtsü nung tangatettep ka ser inyaktsü atema lemsatepa tezüluba nung ayu.
Iba tezülubaji tarutsü nung refugee tebilemtsütem atema tamendakdak ka ama amshitsü.
Iba telemtetba ya telatet ana nung ajemdaker agia liasü koba ajanga refugee tem den Turkey nunger yaritsü aser mashi mapang aitba refugee tem nokdangtsü.
Syria aser Iraq refugee tem anepalua teyari agütsütsü asoshi Turkey nem EU-i taküm aser sangküm atema sen euro billion ka agütsütsü asoshi iba tezüluba nung renema lir. Ano refugee karbo Turkey nungi Europe-i belener aotsü lenmanga lapokja lir.
Iba dak sentakba nung Turkey-i linük nung aliba tzükümlen tanükertem tali tashi itshitsü, Greece nunger navy den tesendaktep akhangshitsü, Greece o Bulgaria arrtsülen tazüokba shitak yua mashi mapang aitba refugee tem nokdangtsü nüngdaker.
Tan iba tezüluba nung tangatetep tajung kati arura Europe aser Turkey na tesendaktep tajungba akümtsü aser mapang talangka nungi Turkey nunger Europe-i satema otettsü asoshi visa agütsüyim nung lenmang satema lapoktettsü akok.