Turkey bomb lendong nung 8 pokset; 100 dak tema yiru

Turkey southeast tsütsü, Diyarbakir yimti nung tentetba police tesepti nung bomb lendong atalokba sülen nüburtem lendong atalokdak sentepa aliba noksa nung angur. (Diyarbakir, November 04)

Diyarbakir, November 04 (Agencies): Turkey southeast tsütsü, Diyarakir yimti nung tentetba police tesepti nung car gari nung alenokba bomb pokdakja tanü, Hokolbar nü lendong atalokdaktsüba osang ka police-i metetdaktsüogo.
“Tan lendong nung ishiba agi nisung 8 poksetba aser nisung 100 dak tema yiruba osang tang tashi nung jangjaogo. Ano, tan lendong atalokdaktsüba atema Turkey sorkar anemer Kurdistan Workers Party (PKK) kiralongrar teloki tenüng agia metetdaktsüogo,” ta Diyarbakir nung tentetba governor’er office-ia sangdong ka ajanga metetdaktsü.
Turkey police-i PKK telok pusemer aser Turkey opposition telok tulutiba tarensen nung tanabuba, Kurdish People’s Democratic Party (KPDP) yimtenren telok nungi lenir 10 shi yashi, Brehostibar nü pua ayuba sülen tan lendongji atalokba osang angazükogo.
Turkey sorkar anema Turkey southeast tsütsü küm 30 shi lendong balala atalokdakja nokdakba PKK teloki taoba ita 18 tsüngda nung tan amala lendong aiben atalokdaktsüba osanga bushiteta lir.
Turkey sorkari PKK telok pusemba ken o nung ajemdaker, KPDP yimsüsür, Selahattin Demirtas aser Figen Yuksekdag na apuba atema tebilemtsü akaba olen ka European Union (EU)’er foreign affairs & security policy lenila, Frederica Mogherini-ia metetdaktsü.
Aijisüaka, “Turkey sorkari ozüngi melaba ama inyaka, tan KPDP lenirtemji apu,” ta shia, Turkey Justice Minister, Bekir Bozdag-i par Turkey sorkar metentsüba olen ka metetdaktsüogo.