Turkey EU nung züngsemtsü atema jembitsü menungdaker: Merkel

Berlin, November 30 (Agencies): European Union (EU)-i Turkey linüki benokba EU nung züngsemtsü onük benoka jembitsü menungdakba olen ka Germany Chancellor, Angela Merkel-i tanü, Bodbar nü sangoktsüogo.
Merkel-i lar yimsüsürtem den Berlin yimtiba nung ajurutepa senden amendang iba olenji sangoktsü.
Turkey linüki 2005 küm nungi tenzüka EU nung züngsemtsü onük benoka arur saka par linük tanü tashi EU züngsem mekümteti lir.
“Alima talisa, Europe-i tang ajurushia aliba migrant nisungtem den sentakba khuret bentettsü atema EU-i Turkey teyari nungdaker,” ta shia, EU-i Turkey den angatetteptsü asoshi Merkel-i aiben ajungshia lir.
Ajisüaka, EU-i tang tangbo külem North Atlantic Treaty Organization (NATO) züngsem, Turkey linüki benokba EU nung züngsemtsü onük benoka mejembidaktsünüba olen ka lai tan sangoktsür lir.
Turkey linük EU nung züngsemtsü alizüngji taruba küm ishika tsüngda nungbo mataloktsü ta EU aser Ankara naprong tangatetba lir saka Turkey linüki par linük EU nung züngsemtsü asoshi benokba onük magizükra, par linüki par arrtsü lapokja, migrant nisungtem tetsükdaktsü kecha meli Europe-i idaktsütsü amokmerentsü tenzüka lir.
Par linük EU nung züngsemtsü atema metena akümtsü atema Turkey linüki kiralongrar anemtsü ozüng tajungba küma melenshitsü densema, nungdakba temelenshi agitsü asosohi EU-i tuyua lir saka Turkey linüki iba tetuyubaji magizüki lir.
Ano, Turkey mitkar telok kati tamakok ngua, par linük indang yimsüsütsü tashi tashiyim agi taküm July ita agitsü merangba ken o nung ajemdaker, Ankara-i temulung melemi bilemer nisungtem kanga sashia rishikangshitsü tenzükba yong par linüki EU nung züngsemtsü atema benokba onük mejembi atatsü atema European Parliament-ia taoba hopta lemtetogo.
Turkey linük indang yimsüsütsü tashi tashiyim agi agitsü merangba sülen Turkey sorkari mitkar, kaketshisatsü tesayur, obendanger, osangbener aser Kurd kin lenirtem densema, nisung 125,000 dak tema mapa balala nungi anentsüba den nisung noklang aika tepuokdak puoka merenshiba osang bushitetogo.
EU lenirtemi par ita shia amenba senden Brussels nung taruba December ita 15-16 nü tashi amentsü ayonga lir aser iba senden nunga parnoki Turkey linük den sentakba onük tongtipangsüa benoka jembitsü renema lir.