Turkey EU nung züngsemtsü maparen anentsüla: Europe

Strasbourg, November 24 (Agencies): EU yimsüsürtemi Turkey linük European Union (EU) nung züngsemtsü atema jembiba maparen telatetba mapang meli anena alitsü onük benokogo.
Turkey linüki par linük anemer ta temulung melemi bilemertem nem aibelenba den mesütep temerenshi tesashi agütsüba ken o nung ajemdaker, par linüki EU nung züngsemtsü atema benokba onük mejembi anena alitsü asoshi EU yimsüsürtemi tan benoker lir.
Turkey mitkar telok kati par linük yimsüsütsü tashi tashiyim agi taküm July ita agitsü merang saka parnoki tamakok ngua liasü.
Iba ken o nung ajemdaker, Turkey sorkari sorkar anemer ta temulung melemi bilemertem mapa nungi anentsüba den parnok tepuokdak puoka yua kanga sashia mererenshitsü tenzüka lir.
European Commission-i Turkey EU nung züngsemtsü onük jembiba maparen anena alitsü ajungshitsü atema European Parliament yimsüsür 479 tashi onük agizükba aser parnok 37 tashi iba onükji magizükba osang jangjaogo.
Turkey linüki küm 11 tejaklen nungi tenzüka, par linük EU nung züngsemdaktsütsü onük benoka lir saka tanü tashi par alizüng asangsang nung mataloki lir.
EU lenirtemi ita shia amenba senden taruba December ita 15-16 nü tashi par tesepti, Belgium yimtiba, Brussels nung amentsü ayonga lir aser iba senden nung parnoki Turkey den sentakba onük tongtipangsüa benoka jembitsü renema lir.