Turkey Foreign Minister den ajurutsü mulunga lir: Lavrov

Nicosia, December 02 (Agencies): Turkey Foreign Minister, Mevlut Cavusoglu den tan hopta ajurutsü mulungba olen ka Russia Foreign Minister, Sergei Lavrov-i tanü Bodbar nü metetdaktsüogo.

Belgrade yimti nung tan Brehostibar nü nungi tenzüka anogo 2 asoshi amentsü ayongba OSCE Ministerial Council senden tezülen ajuruteptsü asoshi Cavusoglu-i Lavrov ayongba osanga jangjaogo.

Lavrov o Cavusoglu nati asangsang nung ajurutepa senden menra, iba sendenji Turkey-i Russia’er jet tayimtsü anüng tom nungi kazüka yokba sülen linük ana nungi tongti lenirtemi tan mezüngsüa tsüngdong ajuruteper asütsü.

“Cavusoglu den ajurutepa pai benokba o angadangtsü mulunga lir,” ta Cyprus linük semdanga alisang, Lavrov-i tanü metetdaktsü.

Turkey-i Turkey-Syria arrtsülen Russia’er tayimtsü anüng tom nungi taoba hopta kazüka yokba sülen Russia aser Turkey na tsüngda mangatettep adoka tang tesendaktep mejungi lir.

“Turkey mitkartemi ozü linük kümzüktsü maparen inyaka Russia tayimtsüji kazüka yok,” ta shia, Turkey Tir, Recep Tayyip Erdogan-i tayimtsü kazüka yokba atema Russia dang taidok memeshitsü lemtetba osang ka tan hopta tetenzüklen sangoktsüogo.

Ajisüaka, par tayimtsü Turkey lushi telungi mai ta shia, Russia Tir, Vladimir Putin-ia tang Turkey anema rongsenren tenokdangba sentong benoka lir.

Ano külen, Turkey o Russia nati tesendaktep tajungba küma yanglushir arok arrür, Islamic State (IS) kiralongrar telok anema külemi lungjemer raratsü tajungshiba olen ka US Tir, Barack Obama-ia yashi, Mongolbar nü metetdaktsüogo.