Turkey-i democracy kümzüktsü ajungshir: EU

Brussels, November 08 (Agencies): Turkey sorkari democracy yimsüsütsü inyakyim kümzüktsü mechi opposition teloktem den angatettepa, yimtenren tebentetbaren bener arutsü tajungshiba olen ka European Union (EU)-i sangoktsüogo.
EU-i Turkey-i benokba EU nung züngsemtsü onük angadangtsü anogo ka anünga alidang tanü tajungshiba olenji sangoktsür lir.
Mitkar telok kati tamakok ngua, taküm July ita tashiyim agi Turkey linük tashi agitsü merangba sülen aibelener nem tasüba temerenshitsü agütsü temerenshi tanaben agütsü tenzükshitsü asoshi Turkey sorkari onük benoka lir aser EU-i par senden amendang iba onükjia tongtipangsüa benoka jembitsü renema lir.
“Turkey linüki parliamentary democracy inyakyim kümzüka ayutsü, nübur temeten anema meinyaktsü aser EU nung züngsemtsü asoshi temsüa alitsüsa nungdakba maparen inyaktsü ajungshir,” ta EU foreign policy lenila, Federica Mogherini-i metetdaktsü.
“Turkey linük EU nung züngsemtsü ken o nung ajemdaker, EU aser EU nung züngsemba linüktemi par linük kanga junga tendangtsü renema lir,” ta lai shisem.
Laisa ashiba agi, Turkey linüki Kurdish PKK kiralongrar telok ama samatsütsü temeten yua lir saka PKK telok arishitsü ken o nung ajemdaker ozüng kübok alir Kurd nunger yimsüsür aser parnoki tentetba yimtenren telok samatsütsü merangbaji ozüng alema inyaker lir.
Turkey linüki ozüng alema Greece linük nung jenoka alir refugee nisungtem par linük nung jenokdaktsüba melena, EU-i Turkey nung jenoka alir Syria refugee nisungtem atema nungdakba teyari agütsütsü aser Turkey-i aginüba ama, par linük EU nung züngsemtsü onük benoka angadangtsü asoshi EU aser Turkey nati taküm March ita nangzüktepa lir.