Turkey-i IS anema tesashiba raratsü ajungshir: Carter

Washington, January 23 (Agencies): Turkey linüki Islamic State (IS) ta ajaba kiralongrar telok tetsüti anema taoba mapang nungi tesashiba raratsü tajungshiba olen ka US Secretary of Defence, Ash Carter-i metetdaktsüogo.
“Turkey-i IS anema rarabaren nung tongti shilem agia arur saka par linüki IS anema tesashiba raratsü ajungshir,” ta Carter-i metetdatksü.
Paisa ashiba agi, Turkey ya US linük pusemba tongti linük ka lir aser US-ia Turkey linük kümzüka ayutsü maparen nungita yaritsü mulunga lir.
“Turkey sorkari par lushi nung US mitkar tayimtsütem anendakja IS anema rarabaren nung US-i aniba alima teloktep mitkartem den yaritepdagi,” ta Carter-i ashi.
“Ajisüaka, Turkey linüki Iraq aser Syria na den arrtsü talang lemsateper aser item arrtsülenji ajangdanga bendangertemi Iraq aser Syria nati oa IS telok nung züngsema par telok asoshi tongpang raraba osang bushiteta lir. Anungji, Turkey linüki par arrtsü tali tekümdangba mita ozüng alema inyaktsü meranger nisungtem nokdangtsü nungdaka kümogo,” ta Carter-i shisem.