Turkey-i NATO mitkar teyari meshia mali: Stoltenberg

Oslo, July 27 (Agencies): Turkey-i tang tenzüka aliba Islamic State (IS) ta ajaba kiralongrar telok aser Kurd kin züngsemtemi tentetba PKK telungpurtem anema rarabaren nung yariteptsü asoshi North Atlantic Treaty Organization (NATO) dang mitkar teyari meshia mali ta NATO lenisang, Jens Stoltenberg-i tanü Hombar nü metetdaktsüogo.

“Turkey mitkartemi bomb-tem tsükdakja kiralongrar aser telungpur den raraba ajanga par sorkari PKK den yimjung nung alitsü tezüngzüktep agitsüsüa renemba sentongtem ajunga amajok kümdaktsütsü ana nung dang lir,” ta pai ashi.

Turkey-i onük benokba sülen par miktar aser IS o PKK na tsüngda hopta ka shi tejaklen nungi tenzüka tongpang kanga sashia raratsü tenzükba den sentakba onük benoka jembiteptsü nükjidong nung NATO ambassador-temi asüng, Mongolbar nü senden amentsü ayonga lir.

“Turkey indang mitkar kanga tashi ita lir aser iba yongji par linüki NATO nungi mitkar teyari tanü tashi meshia mali,” ta Stoltenberg-i osang jangjashitsü.

IS züngsemtemi Turkey arrtsülen nisung 32 tashi tepsetba sülen Turkey-i tan mezüngsüa, taoba hopta nungi tenzüka IS-i tesep tentetba tesemtem nung bomb-tem kalokja amaktsü tenzükba osang bushiteta lir.

IS teseptem amaktsü tenzükba den külemi, Turkey police ketdangsertemi par linük kübok densemba tesem balala nungi IS züngsemtem ta temulung malemba nisungtem aputsü tenzükba osanga jangjaogo.