Turkey-i nübur temeten kümzüktsü ajungshir: Mogherini

Brussels, July 22 (Agencies): Turkey sorkari par nüburtem nem agütsüba temeten kümzüktsü tajungshiba olen ka European Union (EU) Foreign Policy lenila, Federica Mogherini-i tanü, Hokolbar nü metetdaktsüogo.
Turkey mitkar telok kati tashiyim agi Turkey linük indang yimsüsütsü tashi tamakok ngua agitsü merangba sülen sorkar anemer ajunga ajemreptsü nükjidong nung Turkey Tir, Tayyip Erdogan Recep-i aniba Turkey sorkari par linük ajunga nung ita 3 atema emergency ozüng yashi, Bodbar nü nungi tenzüka benoka lir.
“Democracy yimsüsütsü yimya benshibaren aser ozüngi melaba ama tentetba tentet ajunga EU-i pusema nungiter ta Turkey dang metetdaktsür. Anungji, sorkar anemer anemtsü merangdang Turkey sorkari nüburtem indang temeten anema meinyaktsü ajungshir,” ta Mogherini-i metetdaktsü.
“Turkey mitkar telok kati linük indang yimsüsütsü tashi tashiyim agi agitsü merangba sülen Turkey sorkari osangbener, kaketshisatsü sayur, o bendanger aser sorkar mapa balala nung inyakertem merenshitsü tenzükba nguogo aser EU  densema, alimai kasaji aitsür,” ta lai shisem.
Mitkar telok kati tashiyim agi linük indang yimsüsütsü tashi  taoba hopta tamakok ngua agitsü merangba sülen Turkey sorkari nisung meyirijang jenti mapa nungi anentsüba, tepuokdak puoka ayuba aser parnok anema bushisüngdang kanga sashia agitsü tenzüka lir.
Ano külen, par Turkey linük nung benokba emergency ozüng atsünglangshitsü renemba osang ka Erdogan-ia tanü metetdaktsüogo.
“France-i par linük nung  emergency ozüng mezüngsüa ita 3 atema benok saka iba mapangji ita 3 agi talangba küma atsünglangshi. Ano, kasaji ita 3 agi maneni talangba kümja lir. Anungji, linük ka nung benokba emergency ozüng talangba küma atsünglangshitsüji tezüba maparen lir,” ta shia, nungdak dang adokra, par Turkey sorkari emergency ozüng mapangji talangba küma atsünglangshitsü renemba olen ka Erdogan-i sangoktsü.
Emergency ozüng benokba ajanga Erdogan aser pai aniba cabinet yimsüsürtemi parliament ajangdanga temzüng ozüng tasen tetsükdakba kecha majurui yanglua benshitsütettsü aser nungdak dang adokra, nübur nem agütsüba temetena agientsü tashi angur lir.