Turkey-i par mitkartem Iraq nungi anitettsü lemteter

Ankara, December 20 (Agencies): Iraq sorkar den tesendaktep tamajungba mekümdaktsütsü tangatetba nung Turkey-i par mitkartem Iraq nungi anitettsü telemtetba agiogo.
Turkey-i tawa Iraq-i yokba mitkartem anitetadoktsü tajungshiba olen ka US Tir, Barack Obama-i metetdaktsür anogo ka lir külen Ankara-i par mitkartem anitettsü telemtetba ya agir lir.
“Iraq sorkar den tongtepratep meshidaki agiba ajanga ozü mitkartem Islamic State (IS) kiralongrartemi tashiyim agi agiba Mosul yimti anasa, Bashiqa mitkar tesepi tawa yok,” ta Turkey foreign ministry-ia tanü osang jangjashitsü.
Par mitkartem anitettsü lemtetba osang sangoktsüaka, par mitkar züngsem kwi anitettsü aser parnok koba tesemi yoktsü iba osang tejangjabo ministry-i memetetdaktsü.
“IS anema raratsü mitkar terenemshiba agütsür mitkar takümtem kümzüka ayutsü asoshi ozü mitkartem Iraq-i yokshir,” ta shia, Turkey-i par mitkartem Bashiqa tesepi yokba ajanga Iraq sorkar kanga jashidaktsüogo.
“Tang Iraq-i yokshia aliba mitkartem anitetadokba ajanga Iraq den adokba mangatettepbaren agiena ner linük ana tsüngda tesendaktep tamajungba mekümdaktsütsü ajungshir,” ta Obama-i telephone ajanga Turkey Tir, Recep Tayyip Erdogan tan Hokolbar nü ajungshiba osang jangjaogo.