Turkey-i par tepuokdak puoka ayur osangbener 2 chioker

Turkey kübok Istanbul nung tentetba Silivri tepuokdak nungi chiokba sülen Cumhuriyet osangkaket nung editor-in-chief, Can Dundar (Tiyongtsü, achijilen) aser kasa osangkaket’er Ankara correspondent, Erdem Gul (Tiyongtsü, abelen) nati tepuokdak kimalen osangbener den ajuruba noksa nung angur. (Istanbul, February 26)

 Ankara, February 26 (Agencies): Constitutional Court-i chioktsü ozüng agütsüba sülen Turkey linüki par tepuokdak puoka ayuba osangbener 2 tanü, Hokolbar nü chiokba osang ka metetdaktsüogo.

Turkey sorkari tognpang nung amshitsü osettsüset ozüng alema Syria-i shibelenba osang adoktsüba ken o nung ajemdaker aija tepuokdak ita 4 tashi puoka ayuba sülen osangbener anaji tanü chioker lir.

Cumhuriyet osangkaket nung editor-in-chief, Can Dundar aser Anakara correspondent, Erdem Gul na tanep Istanbul tepuokdak nungi chiokba sülen tena pusemertemi tena pelashishia agizükba osang jangjaogo.

“Osangbentsü temeten ajembanga ayutsü merangba linük indang Constitutional Court-i tan Gul küna chioktsü lemtetba ya otsüsütsü telemtetba agir lir,” ta Dundar-i tepuokdak nungi temaleni adokba sülen metetdaktsü.

“Dundar aser Gul na chiokba atema kanga pelar. Ajisüaka, Turkey linük indang miim osangtsüsang alima dang metetdaktsüba ken o tena anema benoka lir aser iba ken o ji taruba March ita okadak angadangtsü renema lir. Iba ken o nung tena aitsüra, okadaki tena nem taküm piyong tepuokdak puoka ayutsü teremenshi agütsütsü akok,” ta Reporters Without Borders nung Secretary General, Christophe Deloire-ia tebilemtsü akaba olen ka metetdakja liasü.

Tetsükdakba kecha meli osangbentsü maparen amokmerena nokdangtsü nükjidong nung Turkey sorkari osangbenertem tepuokdak puoka ayuba osang ka US nung tentetba Committee to Protect Journalist tentetia metetdaktsüogo.