Turkey-i police ketdangser 12,800 mapa nungi anentsü

Ankara, October 4 (Agencies) : July 15 nü Turkey nung sorkar atsüngdoktsü merangba sentong nung shilem agirtem ta tai tonglokja Turkey nung police ketdangser 12,800 tashi mapa nungi anentsüogo.
Police ketdangsertemji US nung alir Muslim cleric Fethullah Gulen sülen anidakertem ta temulung melemi bilemba agi mapa nungi anentsü, ta Turkish police headquarters-i sangdong ka nung metetdaktsü.
Mapa nungi anentsürtem rongnung parnok 2,523 tashi police tanishirtem liasü ta sangdong nungsa shia lir.
Turkey Cabinet-i linük nung emergency anogo 90 tashi atsülangba sülen anogo ka lir, police ketdangsertem mapa nungi anentsüba osang metetdaktsüogo.
July 15 nü sorkar atsüngdoktsü merangba sülen military, police, judiciary aser education ministry kübok sorkar mapa inyaker nisung meyirjang aika mapa nungi anenja lir. Iba onük asoshi nisung 32,000 shi jungnüa pur tepoukdak lir. Ajisüaka, Gulen-i iba mapa nung pai shilem kecha magii ta tekong meranga nokdaker.