Turkey-i taruba ita 6 tashi Syria nung tongti shilem agitsü: Yildirim

Istanbul, August 20 (Agencies): Turkey linüki taruba ita 6 tashi Syria’er mangatettep bentetsü maparen nung tongti shilem agitsü sentong renemba osang ka Turkey Ato Kilonser, Binali Yildirim-i tanü, Honibar nü sangoktsüogo.
Küm 5 tejaklen nungi tenzüka Syria sorkar aser sorkar anemer tsüngda mangatettep adoka tongpang rarabaren anendakja par linük nung yimji yimjung tia bener arutsütsü nükjidong nung Turkey-i tan tongti shilem agitsü sentongji renemer lir.
“Syria nung election agiba jakdang tentettsü renemba teloktep sorkar nung Syria Tir, Bashar al-Assad-i lenisütsü shilem agitsü akok. Ajisüaka, election agia sorkar tasen tentetba sülenbo pa nem Syria lenisütsü sabang nung shilem magidaktsütsü,” ta Yildirim-i tanü Istanbul yimtiba nung osangbener den ajurutepdang ashi.
Syria nung tentetba Kurdish sorkar anemer aser telungpur tali tashi itshiba ajanga par Turkey nung tentetba Kurdish telungpurtem temulung tali uludakja parnoki Turkey sorkar den taoba mapang nungi tesashiba raratsü akok ta Turkey sorkari tebilemtsü khuret benoka lir.
“Turkey sorkari taruba ita 6 tashi Syria nung tongti shilem agitsü sentong renema lir. Syria nung tentetba kin kidong balala rong nung mangatettepbaren tamajungba mekümdaktsütsü nükjidong nung ozü sorkari Syria nung tongti shilem agitsü sentongji renemogo,” ta Yildirim-i nenshia ashi.
Kurd kin-i tentetba Syria sorkar anemer telok, Kurdish YPG-i Hasaka yimti shilem tuluba ka agia lir aser iba yimti ajunga tanaben agishitsü nükjidong nung Syria sorkar mitkartemi Hasaka nung tan hopta tongpang kanga sashia raraba osang bushitetogo.
Kurdish YPG telok ya US sorkari Islamic State (IS) kiralongrar telok anema raratsü nükjidong nung nungitba Syrian Democratic Forces (SDF) telok nung densemba tongti telok ka lir.
Iran, Gulf Arab linüktem, Russia asr US densema, alima linüktem den aroki lungjemer Syria nung teti asoshi yimji yimjung tia bener arutstütsü alizüng ayuba olen ka Yildirim-isa sangoktsüogo.